ಅಪ್ಪ ಗೌಣ ಏಕೆ ?

ಅಮ್ಮನ ಕೈಗೂಸಾಗಿ ಬೆಳೆದೆವು ನಾವು

ಅವಳ ಕೈಯಾಧಾರ ಅಪ್ಪನೆಂದು ತಿಳಿಯಲ್ಲಿಲ್ಲವೇಕೆ?

 

ಹಸಿದ ಹೊಟ್ಟೆಯನು ತಣಿಸಿದಳು ಅಮ್ಮ

ಹಸಿವು ತಣಿಸಲು ದುಡಿದ ಅಪ್ಪನ ಕೈಗಳು ಕಾಣಲಿಲ್ಲವೇಕೆ?

ಕಣ್ಣೀರನ್ನು ಒರೆಸಿದಳು ಅಮ್ಮ 

ಹೆಗಲ ಮೇಲೆ ಕುರಿಮರಿಯೆಂದು ಎತ್ತಾಡಿಸಿ ಕಣ್ಣೀರನ್ನೇ ಮರೆಸಿದ ಅಪ್ಪನನ್ನು ಮರೆತುದೇಕೆ ?

ಕಷ್ಟಗಳ ಸೋಂಕು ತಗಲದಂತೆ ಬೆಳೆಸಿದಳು ಅಮ್ಮ 

ಕಷ್ಟಕ್ಕೆ ಎದೆಗೊಟ್ಟು ಸುಖದ ಛಾಯೆಯನ್ನು ಹರಡಿಸಿದ ಅಪ್ಪನ ನೋವು ಅರಿಯಲಿಲ್ಲವೇಕೆ ?

ಹಬ್ಬ ಹರಿದಿನಗಳಲಿ ಸಂಭ್ರಮಿಸೆದೆವು ನಾವು ಹೊಸ ಬಟ್ಟೆಗಳನ್ನುಟ್ಟು 

ಅವೇ ಹಳೆಯ ಎರಡು ಜೋಡಿ ಬಟ್ಟೆಗಳಲ್ಲಿ ಹಬ್ಬವನಾಚರಿಸಿದ ಅಪ್ಪನ ಕಂಡು ಕಣ್ಣು ಒದ್ದೆಯಾಗಲಿಲ್ಲವೇಕೆ ?

ಅಮ್ಮ ಇದ್ದರೆ ತವರೂರು ಅನ್ನುತ್ತಾರೆ 

ತವರೂರಿನ ಮರ್ಯಾದೆ ಅಪ್ಪ ಎಂದು ಯೋಚಿಸಲಿಲ್ಲವೇಕೆ ?

ನಾಗರಿಕನಾಗಿ ಸ್ಥಾನ ಮಾನಗಳನ್ನು ಗಳಿಸಿದೆವು ನಾವು 

ಅದಕೆ ದಾರಿ ದೀವಿಗೆಯಾದ ಅಪ್ಪನನ್ನು ಕಡೆಗಣಿಸುವುದೇಕೆ?

ಅಪ್ಪ ಅಮ್ಮರ ಪ್ರೀತಿ ಪ್ರೇಮ ಪೂರಕವೇ ಹೌದು 

ಆದರೂ ಅಪ್ಪನ ನಿಷ್ಕಳಂಕ ಪ್ರೇಮ ಗೌಣವೆನ್ನುವದೇಕೆ ?

ಅಮ್ಮ ವಾತ್ಸಲ್ಯದ ಮೂರ್ತಿ

ಅಪ್ಪ ಧೃಡತೆ, ವಿಶ್ವಾಸದ ಪ್ರತಿಮೂರ್ತಿ 

ಅವರಿಬ್ಬರ ಪ್ರೀತಿ ನಮ್ಮ ಪಾಲಿನ ವರವು

ಅಪ್ಪ ನೀನಿಲ್ಲದ ಮನೆ ಬರೀ ಬರಡು ಬರೀ ಬರಡು