🌷દીવાબત્તી 🌷

         શિયાળાનો સમય, સાંજ પણ વહેલી પડતી. આજે કમોસમી માવઠું થયેલું, તેથી ઠંડીમાં પણ વધારો હતો. ગવરીનો પતિ ફૂટપાથ પર બીમારીથી અને ઠંડીથી થર થર ધ્રૂજતો હતો. તેની દયામણી નજરે આસપાસ જોતી હતી, " હવે, શું કરું? કઈ જ ઉપાય જડતો નથી. " છેવટે થોડા લાકડા ભેગા કરી, તાપણું કર્યું, જેથી પોતાના પતિ શંભુને રાહત થાય. થોડા વખતમાં તો તાપણું પણ ઓલવાઈ ગયું. તેની ચિંતામાં વધારો થયો. જમવાની તો કોઈ સગવડ નથી કે પોતાના પતિને જમાડે. તો દવાની તો વાત જ શી કરવી?
       દીવાબત્તી ટાણે બાજુમાં આવેલ મંદિરમાં ઘંટારવ થયો, તેથી તેની મનોમન ભગવાનને પ્રાર્થના કરવા લાગી," હે પ્રભુ ! કૃપા કરજે." અને આંસુ લૂછતી, પોતાના પતિ શંભુ પાસે ગઈ. તે દર્દ, ભૂખ અને ઠંડીના કારણે ડૂસકાં ભરતો હતો. તેની હળવા હાથે, તેના કપાળ પર હાથ ફેરવવા લાગી. તેથી શંભુને થોડી રાહત થઈ.
      રાત્રિનો ગાઢ અંધકાર બધે ફેલાય છે, ઠંડીનો ચમકારો વધતો જાય છે. ત્યારે રોડ પર એક કાર અંધકારને ચીરતી પૂરપાટ દોડે છે. અચાનક એક મંદિર પાસે થોભે છે. થોડીવારમાં એક નવદંપતી કારમાંથી ઉતરે છે. મંદિરમાં દર્શન કરી, કારમાં બેસે છે અને ફરી કાર રોડ પર ધીમે ધીમે દોડે છે, તેમની નજરો આસપાસ કોઈને શોધે છે. ત્યાં ફૂટપાથ પાસે કાર થોભી જાય છે. કારના લાઈટના અજવાળાથી ગવરી પણ ઊભી થઈ જાય છે. નવદંપતી ચાલતા ચાલતા સીધા ગવરી પાસે જાય છે. ગવરી હાથ જોડે છે અને મોટા મોટા ડૂસકાંઓથી રડી પડે છે. નવદંપતી ગવરીને દિલાસો આપે છે. ભગવાન સૌ સારાવાના કરશે.
       બંને પહેલા ગવરી અને શંભુને સાથે લાવેલ ભોજન પ્રેમથી જમાડે છે. પછી પોતાની સાથે લાવેલ મોટા ગરમ ધાબળા બંનેને આપે છે. વાતચીત દરમિયાન શંભુ બીમાર છે, તે જાણી લે છે. ડૉ. ઓમ કારમાંથી પોતાની દવાની બેગ લઈ, શંભુને તપાસીને દવાઓ આપે છે. પોતાની હાજરીમાં દવાઓ પીવડાવે છે. થોડીવારમાં શંભુને દર્દમાં રાહત થઈ જાય છે. ડૉ.ઓમ અને તેની પત્ની ત્યાંથી જવાની રજા માંગે છે. ગવરી અને તેનો પતિ શંભુ આભાર માને છે. ત્યારે ડૉ. ઓમે કહ્યું, " આજે મારો જન્મદિવસ છે, મને આશીર્વાદ આપો." ગવરી બંને નવદંપતીને આશીર્વાદ આપે છે. ડૉ. ઓમ જતા જતાં પોતાની હોસ્પિટલનું કાર્ડ આપે છે અને કહ્યું," જ્યારે કોઈ દવાની જરૂર હોય, તો હોસ્પિટલ આવી જશો, બીજી કોઈ ચિંતા કરશો નહીં." બંને ડૉ. ઓમ અને તેની પત્ની સ્મિત સાથે, કારમાં બેસી જાય છે. ગવરી અચરજ ભાવે, તેમને દૂર દૂર સુધી જોઈ રહે છે અને મનોમન ભગવાનની અમૂલ્ય ભેટથી ખુશ થાય છે. તે ઉઘાડા પગે, નવા જોશ અને ઉમંગ સાથે, મંદિરમાં દોટ મૂકે છે અને ભગવાનના દર્શન કરી, રડતાં રડતાં આભાર માને છે અને જોરજોરથી મંદિરમાં ઘંટારવ કરે છે.