વિરહિણી ગીત
વિરહિણી ગીત
ઝરમર ચંદનતલાવડી કાંઠે ઊગ્યા ગુલમહોર રે ..... રામૈયારામ
આદશ - ઓદશ ચણોઠડીના ગોટા ચારેકોર રે .... રામૈયારામ
ઘરચોળાંના દેશમાં રે ઊગ્યા શુકનગીત;
ઠણકું ખાતાં વાલમા આડી આવી ભીંત!
તડકાની પાંસળિયે ફૂટ્યાં ગલગોટાના પ્હોર રે....રામૈયારામ
મારામાંથી બહાર કૂદતો ધ્રુજે થરથર મોર રે .... રામૈયારામ
મારા મઘમઘ શ્વાસના ફૂટેલાં ઓછાડ;
ચકલી ભીની ચીસનાં હાંફે પહાડે- પહાડ!
ઉઘાડા કંકણની ફરતે બાંધો રેશમદોર રે....રામૈયારામ
સાંજ ઢળ્યે ઉઘાડ આભમાં માલીપા ઘનઘોર રે ....રામૈયારામ
ઝરમર ચંદનતલાવડી કાંઠે ઊગ્યા ગુલમહોર રે ..... રામૈયારામ!