તે ગમ્યું

આમ અચાનક વરસાદ સાથે આવ્યા તે ગમ્યું,

હતા સાવ કોરાકટ, ને અમને ભિંજવ્યા તે ગમ્યું,

તમે અને વરસાદ લાગે છે કે પર્યાય એકમેકના,

સૂકી ધરા અને તરસતા મનને છિપાવ્યા તે ગમ્યું,

પ્રતીક્ષા કરાવી પરાકાષ્ઠા સર્જીને પછી આવવું,

મોડામોડા અવની ને અમને હરખાવ્યા તે ગમ્યું,

આગમન જ એવું રહ્યું કે ભય ઉત્પન્ન કરાવતું,

નયનમાંને તરુવરમાં હર્ષાશ્રુ ટપકાવ્યા તે ગમ્યું,

અઢળક વરસ્યા જાણે સાટું વાળવાનું વિયોગનું,

અમારા જ આંગણે, અમારા થૈ વસ્યા તે ગમ્યું.