ફરિયાદ આ અમારી

ફરિયાદ આ અમારી, કરુણાળુ ના સુણે જો, સુણશે પછી કહે કો ?

અરજી આ અલ્પ મારી, કરુણાળુ ના સુણે જો, સુણશે પછી કહે કો ?

તું છે પિતા અમારા, સ્નેહીથકી વધારે;

માતા જ ના સ્વીકારે, સ્વીકારશે પછી કો ?...ફરિયાદ.

શરણે પડેલ તારે, ને ભક્ત શીશ ધારે;

અમને નહીં ઉગારે, ઉગારે પછી કો ? ...ફરિયાદ.

દર્શનને પ્રાણ ચાહે, જલતો વિયોગ-દાહે;

ના દાહ તું જ ઠારે, ઠારે પછી કહે કો ? ...ફરિયાદ.

આ જાય કાળ વીતી, વધતી વળીય પ્રીતિ;

તું જો કૃપા ન ઢાળે, ઢાળે પછી કહે કો ? ...ફરિયાદ.

માંગું છું હાથ જોડી, જીવું તને ન છોડી,

છોડીશ ના મને તું, ચિંતા નથી પછી હો ! ...ફરિયાદ.

‘પાગલ’ તને પૂજે છે, સંગીતમાં સ્તવે છે,

સાકાર થૈ સુણી લે, ચિંતા પછી નથી હો ! ...ફરિયાદ.

- શ્રી યોગેશ્વરજી