પહેલી

મારી પ્રીતડી પૂછે છે પહેલી, ઓ કાનજી,

તમ સંગે રહેવા મળે તો કેવું સારું ?

મારી અંતરની આંખડી તરસે છે, ઓ કાનજી,

મારો તલસાટ બને તો કેવું સારું ?

મારાં મનમાં ઉમટયાં છે સૂરો મજાનાં, ઓ કાનજી,

તમારી વાંસળી સંભળાય તો કેવું સારું ?

મને લાગ્યો છે વિરહનો ભાર ઓ કાનજી,

તમે મિલનની ક્ષણ બનો તો કેવું સારું ?

મને સંભળાય છે પાયલનાં ઝણકાર ઓ કાનજી,

મને રાસ રમવા મળે તો કેવું સારું ?

મારે રંગાવું છે પ્રેમનાં રંગથી ઓ કાનજી,

મને હોળી ખેલવા મળે તો કેવું સારું ?

મારાં દિલમાંથી નિકળે છે સ્મરણ તમારું ઓ કાનજી,

મને ઝાંખી મળે તો કેવું સારું ?

મારાં હૈયે વરસ્યા છે ઝરમર નીર ઓ કાનજી,

મને હિંડોળે બેસવા મળે તો કેવું સારું ?

મને દેખાય છે મોરને ઢેલ મારે ટોડલે ઓ કાનજી,

મને મુગટ બનવા મળે તો કેવું સારું ?

મારી સુધબુધ તમ સંગ વિસરાઈ જાય છે ઓ કાનજી,

મને સાનભાન મળે તો કેવું સારું ?

મારા અંતિમ સમયે સ્મરણ તમારું થાય છે ઓ કાનજી,

મને તમે મળો તો કેવું સારું ?