માતૃભાષા

ગુજરાતી ભાષા છે પ્યારી મને લાગે વ્હાલી વ્હાલી,

આ માતૃભાષા રૂપે મુજને મળી છે જાહોજલાલી,

પ્રથમ જયારે બોલ્યો મારી માતૃભાષા કાલીઘેલી,

સમજાણી વાચા અને પ્રેમની ચડી'તી મને હેલી,

સમજાય તો એ સહેલી નહીતર છે એક પહેલી,

માઁ ની જેમ જ માતૃભાષા મને લાગે છે વ્હાલી,

કવિઓની કહેલી અને લેખકોની છે લખેલી,

આ ભાષાને તો સંતો એ પણ છે શણગારેલી,

ભજન અને કીર્તનમાં પણ છે ખુબ સમાયેલી,

નરસિંહ અને મીરાનાં પદમાં છે એ ગવાયેલી,

વેદ શાસ્ત્ર અને પુરાણોમાં છે એ પથરાયેલી,

પુરાતન પ્રાચિન કોતરણીમાં છે કંડારાયેલી,

કુંભારની કલામાં કલ્પનાથી છે કલ્પાયેલી,

ભણતર અને જડતરમાં પણ છે જડાયેલી,

ચારણનાં સાહિત્યમાં છે એ સચવાયેલી,

ગઢવીનાં દુહામાં પણ છે એ બિરદાવેલી,

બીજી બધી ભાષાઓમાં પણ છે વખણાયેલી,

"મોહિત" નાં મનમાં માતૃભાષા છે ખુબ વસેલી!