કાનકુંવર

કાનકુંવર નંદના કુંવર તમને વિનવું રે,

છેડલો મારો મેલી દિયો હોજી હોજી.

 હું છું ગોકુળની ગોવાલણ જો,

 હું છું ભોળી ભરવાડણ જો,

 છેડલો મારો મેલી દિયો હોજી હોજી.

જાઉં મારે વનરાવનની વાટે જો,

મહીં માખણ વેંચવાને કાજે જો,

છેડલો મારો મેલી દિયો હોજી હોજી.

 મલક આખું જોશે ને કરશે વાત જો,

 કેમ કરી નિશરીશ નગર મોજાર જો,

 છેડલો મારો મેલી દિયો હોજી હોજી.

ડેલીએ બેઠાં મારા સસરાજી જો,

કેમ કરી હું ઘરમાં જઈશ જો,

 છેડલો મારો મેલી દિયો હોજી હોજી.