કાંઈ વરસાદ પડે છે !

આભલું ફાટ્યું ઘનઘોર ને પાણી રેલમછેલ જાય, કાંઈ વરસાદ પડે છે !

ઘરર ધડમ ધૂમ, વાદળાં ગાજે વીજળીના લિસોટા થાય, કાંઈ વરસાદ પડે છે !

ડ્રાંઉં, ડ્રાંઉં મેડકાં બોલે, મોરલા મલ્હાર ગાય, કાંઈ વરસાદ પડે છે !

ઝૂં, ઝૂં, ઝૂં, સૂઉં, રૂમઝૂમ પવન રઘવાયો વાય, કાંઈ વરસાદ પડે છે !

પર્વતોની ફાંદ ચીરી ઝરણાં ફૂટે, ઊભડક જાય, કાંઈ વરસાદ પડે છે !

આ નખરાળી નદીઓ ઉધમાત કરતી કરતી દરિયે ફંટાય, કાંઈ વરસાદ પડે છે !

પક્ષીઓ ખંગોળિયું ખાય, ચકોર અપૈયો છોડે, વૃક્ષો ન્હાય, કાંઈ વરસાદ પડે છે !

મોંભારેથી નળિયામાં પડી, અળવિતરો લપસણિયું ખાય, કાંઈ વરસાદ પડે છે !

ચૂંદડી ચોંટી હૈયે, ચૂડલો, કાજળ ને સિંદૂર પલળી જાય, કાંઈ વરસાદ પડે છે !

શરમાતું જોબન નેતરપેતર ને તું કોરેકોરો હાય, કાંઈ વરસાદ પડે છે !

હું ભીનીભીની ઠૂંઠવાઉં, મારા અંગેઅંગમાં ધબકાર, કાંઈ વરસાદ પડે છે !

હું ઝૂરીઝૂરીને ફોરાં જેવડાં આંસુ પાડું હાય - 

ને વંઠેલો વરસી વરસીને ધોઈ જાય, કાંઈ વરસાદ પડે છે !

રે લુચ્ચો કાંઈ વરસાદ પડે છે !