જોઉં તારી વાટડી

મોંઘેરા માનવ દેહ તણું મૂલ્ય સમજાવવા આવજો,

અંતરના ઓરડે અજવાળા પાથરવાને પધારજો,

હે પ્રભુ ! ઝરૂખે બેસી જોઉં છું તારી વાટડી..!

અંતરમનનાં સઘળાં દોષો સમૂળપણે નાથ કાપજો, 

સદ્દગુણોના સિંચન થકી આતમ દીપ પ્રગટાવજો,

હે પ્રભુ ! ઝરૂખે બેસી જોઉં છું તારી વાટડી..!

ષડરિપુ નાથવા અક્ષરબ્રહ્મનો યોગ કરાવજો,

સમજણની સુવાસ પ્રસરાવી હૈયું મ્હેંકાવજો,

હે પ્રભુ ! ઝરૂખે બેસી જોઉં છું તારી વાટડી..!

ઉરમાં રહેલ અગણિત અભિલાષ પૂરજો, 

દુન્વયી સંસારની પરિભાષા સમજાવજો,

હે પ્રભુ ! ઝરૂખે બેસી જોઉં છું તારી વાટડી..!

માનવતા-મમતાની સરવાણી નિત્ય વહાવજો,

અમ જીવનપુષ્પ મઘમઘતાં ફૂલ સમું બનાવજો,

હે પ્રભુ ! ઝરૂખે બેસી જોઉં છું તારી વાટડી..!

સંસારસાગર તરાવવા હરિ અવશ્ય પધારજો,

જ્ઞાન તણી ક્ષિતિજ અનંત સ્તરે વિસ્તારજો,

હે પ્રભુ ! ઝરૂખે બેસી જોઉં છું તારી વાટડી..!