ચકલી.

ચકલી ચીં ચીં કરતી આવે

સળી મોઢામાં લેતી આવે.

છબી પાછળ માળો બનાવે,

ઘરને એ તો જીવંત ગણાવે.

નથી એ ઘર કેવળ મારું તારું, 

પંખી માનવનું હોય સહિયારું.

કરી કિલ્લોલ સૌને સંભળાવે,

ઘરને એ તો જીવંત ગણાવે.

દાણો મુખમાં લૈને એ જાતી,

ડગલે પગલે કેવી હરખાતી,

બચ્ચાંને ભાવથી ખવડાવે,

ઘરને એ તો જીવંત ગણાવે.

ઉનાળે મોં ખુલ્લું રાખનારી,

શ્વાસોશ્વાસ કેટલા ભરનારી.

માયા માનવને એ તો લગાવે,

ઘરને એ તો જીવંત ગણાવે.

વર્ષાૠતુમાં હોય મલપતી,

ખાબોચિયામાં રખે નહાતી,

કદીક રેણુ સ્નાન પણ કરાવે

ઘરને એ તો જીવંત ગણાવે.