બાળગીત - પેલ્લે નંબર પાસ
બાળગીત - પેલ્લે નંબર પાસ
પેલ્લે નંબર પાસ થવાનું રોજ...
ઓ પરમેશ્વર ! તારી માથે છે કંઈ આવો બોજ ?
મારે પેલ્લે નંબર પાસ થવાનું રોજ...
તારે માથે મોરપીંછ બસ; એનો કયાં કંઈ ભાર ?
ગોવર્ધન તો ઠીક; આવી ઉપાડ મારું દફતર તું એકવાર !
હૉમવર્કનાં કાળીનાગ ને નાથ ! હવે તો નાથ !
રોજ ટેસ્ટનાં કુરુક્ષેત્રમાં લડું એકલેહાથ !
સામે પાછી ઊભી કેવડી ટેક્સ્ટબુકની ફોજ !
ઓ પરમેશ્વર ! તારી માથે છે કંઈ આવો બોજ ?
મમ્મી, પપ્પા કે ટીચર; સૌ ટોક-ટોક બસ કરતાં !
સ્પેલિંગનાં સત્તરશિંગા નીંદરમાં બટકાં ભરતા !
હોઉં બધાંની સાથે તો યે બધું ય આઘું -આઘું !
ખૂબ ભણું ને તો ય મને હું સાવ ઠોઠડો લાગું !
ટેન્સ રહું બસ સ્કૂલ બાબતે; કશે ય કયાં છે મોજ ?
ઓ પરમેશ્વર ! તારી માથે છે કંઈ આવો બોજ ?