અનુમતિ

જીવન મારું હશે હરિવર અનુમતિ તારી,

ભરું છું શ્વાસ એમાં પ્રભુ છે સંમતિ તારી,

સુખદુઃખના દ્વંદ્વમાં અમને તું કેવો રમાડે !

દેવાને શીખ કદી મોકલતો આપત્તિ તારી,

પર્વત સમું દુઃખ પણ ના ડરાવી શકનારું, 

જો થઈ જાય ચરણમાં કદીએ રતિ તારી,

સ્તુતિ- નિંદા ઊભયમાં તાટસ્થ્ય રાખતો,

પર રહીને તું જાળવનાર છો વિરક્તિ તારી,

તત્ત્વો પ્રકૃતિનાં કે કદી કોઈના શબ્દો થકી,

હરિ તું કરનારો વળી અભિવ્યક્તિ તારી.