આત્મવિશ્વાસની પ્રબળ જ્યોત-બાપુ

પરમાર્થ કાજે સ્વાર્થ છોડ્યાં ને કર્યાં અનોખા કામ,

પુતળીબાઈના પ્યારા જાયા, તમને સો સો સલામ !

અહિંસાનો એ ધારક મોહન; હતો સાચનો પૂજારી,  

સાદગીના કાયમ પહેર્યાં વાઘા, તમને સો સો સલામ !

છૂત અછૂતને સમાન ગણ્યાં ને ચરખો કાંત્યો જાતે,

નાતજાતના ભૂલાવ્યાં વાડા, તમને સો સો સલામ !

પહેરી પોતડી, હાથે લાકડી ને ગળે સૂતરની આટી,

હિંદ આખું ભમ્યાં પગપાળા, તમને સો સો સલામ !

સાબરમતીના સંત અનોખા; હતાં દ્રઢ નિશ્ચય ધારી,

એકાદશ વ્રતો પૂર્ણ પાળ્યાં, તમને સો સો સલામ !

અમાપ ભર્યો ઈશે આપમાં 'ચુંબકીય' શક્તિનો સ્ત્રોત,

ઘરે ઘરેથી વીરલા જગાડ્યાં, તમને સો સો સલામ !

આત્મ વિશ્વાસની પ્રબળ જ્યોત, સૂકલકડી કાયામાં,

મહાસત્તાના મુળિયાં ઉખેડયાં, તમને સો સો સલામ !