Library
విశ్వాసం
విశ్వాసం
విశ్వాసం
@@@@@@@@@
" ఉదయం వచ్చిన దగ్గర నుంచి చూస్తున్నా ఏంటి రా ఆలోచిస్తున్నావ్ " అని అడిగాడు లంచ్ బ్రేక్ లో బాలు శేఖర్ ని .
" అవును మేము కూడా గమనించాం . రోజు లాగా లేడు ఏమైందిరా ... " అని అడిగారు గోపాల్ , రాజు .
" నాకు ఒకటి తినాలని అని ఉంది రా .... "
" దానికి ఎందుకు అంత దిగులు . ఏంటో చెప్తే ఆంటీ చేసి పెడతారు గా " అన్నాడు రాజు .
" అమ్మ చేయదు రా " అన్నాడు శేఖర్ దిగులుగా .
" ఏంటి ... నువ్వు అడిగితే నీకు ఆంటీ చేసి పెట్టక పోవడమా ... అది జరగని పని . ఆంటీ కి నువ్వంటే చాలా ఇష్టం కదా . నువ్వు అడగక పోయినా నీ కోసం చేసినవి మాకు కూడా తెచ్చి పెడతావు . అలాంటిది అడిగినా చేసి పెట్టక పోవడం ఏమిటి ఆశ్చర్యం గా ఉంది " అన్నాడు గోపాల్ .
" అవును కానీ నేను అడిగింది చేసి పెట్టక పోగా నాలుగు తగిలిస్తుంది " అన్నాడు శేఖర్ దిగులు గా .
" అంటే ఏమి తినాలని అనుకుంటున్నావు రా ... కొంపదీసి మనిషి బుర్ర కాదు కదా " అన్నాడు వెటకారంగా బాలు .
" మీరు నన్ను ఏదో ఒకటి అనకుండా ఉండరుగా ..అందుకే నేను చెప్పలేదు ఇన్ని రోజులు కానీ , ఈ రోజు ఎందుకో బాగా తినాలని ఉంది " అన్నాడు శేఖర్ .
" సారీ రా ... నిన్ను సరదాగా ఆట పట్టిద్దాం అనుకున్నాను . నీకు అంతలా తినాలని ఉంటే అది ఏంటో చెప్పరా ఆంటీ కాక పోతే మా అమ్మ వాళ్ళకు చెప్పి చేయిస్తాం " అన్నాడు బాలు .
" కుదరదు రా మన అమ్మలు అందరూ ఫ్రెండ్స్ . ఆ విషయం మరిచిపోతున్నారు మీరు " అన్నాడు శేఖర్ దిగులుగా .
" ఏంటి రా నువ్వు తినాలి అనుకుని ఆ వంటకం మాకు చెప్పకుండా చంపుతున్నావ్ ... ఆంటీ తో చేయించుకో అంటే కాదు అంటావ్ , మా అమ్మలు చేస్తారు రా అంటే వద్దు అంటావు . నువ్వు పెట్టే టెన్షన్ కి లంచ్ బాక్స్ ఖాళీ చేసినా కూడా నాకు ఆకలి తీర లేదు " అన్నాడు బాలు .
" కావాలంటే నా బాక్స్ కూడా తిను అంతే కానీ అలా మాట్లాడకు " అన్నాడు శేఖర్ కోపం గా .
" బాలు మాటలకు ఏమి కానీ .. అసలు నువ్వు తినాలి అనుకున్నది ఏమిటో చెప్పరా ముందు .... అది నీ చేత ఎలా తినిపించాలో మేము చూస్తాం " అన్నాడు రాజు .
" చికెన్ .... "
" ఏంటి ... మళ్లీ చెప్పు " అన్నాడు గోపాల్ ఆశ్చర్యపోతూ .
" చికెన్ ..." .అని " మళ్ళీ చెప్పు " అని అనబోతున్న గోపాల్ నోరు మూసి " నువ్వు మళ్ళీ అడగకు .... నువ్వు విన్నది నిజమే నాకు చికెన్ తినాలని ఉంది " అన్నాడు శేఖర్ .
" ఇదేం కోరిక రా బాబు ... ఆంటీ కి తెలిస్తే నిజంగా నే నీ తోలు తీస్తారు గా " అన్నాడు రాజు .
" అందుకే కదా ఇలా ఉన్నాను " అన్నాడు శేఖర్ దిగులు గా .
" దానికి ఎందుకురా బాధ ... మేము తెచ్చినప్పుడు తిను .. అప్పుడు ఎవరికీ తెలియదు గా " అన్నాడు బాలు .
" అంటే మీరు ఆదివారం కదా చేసుకుంటారు . ఆదివారం మనకు సెలవు కదా ఎలా తెస్తారు నా కోసం . అయినా ఈరోజు మండే కదా సండే వరకు నేను ఆగలేను బాగా తినాలి అని అనిపిస్తుంది " అన్నాడు శేఖర్ .
" అయితే ఏం చేద్దాం రా ... నీ కోసం వారం మధ్యలో చికెన్ అంటే మా తోలు ఊడుతుంది " అన్నాడు బాలు .
" ఈవినింగ్ హోటల్ కి వెళ్ళదాం " అన్నాడు గోపాల్ హుషారుగా .
" వద్దు రా బాబు ... మా నాన్నకు తెలియని వాళ్ళు ఎవరు లేరు ఈ ఊరి లో . ఎవరైనా మా నాన్నకు చెప్తే నా పని అంతే " అన్నాడు శేఖర్ .
ఇంతలో లంచ్ బ్రేక్ టైం అయిపోవడం తో అందరూ క్లాస్ కి వెళ్ళిపోయారు . క్లాసులో కూడా శేఖర్ దిగులుగానే ఉన్నాడు .
ఏం చేసి శేఖర్ చికెన్ తినే లాగ చేయగలం అని మిగిలిన ముగ్గురు క్లాస్ వినకుండా మరీ ఆలోచించినా ఉపాయం మాత్రం తట్టలేదు .
ఈవినింగ్ క్లాస్ అయ్యాక అందరూ బయటకు వచ్చారు . " శేఖర్ ... దిగులు పడకురా ఏదో ఒకటి చేద్దాం " అన్నారు ముగ్గురూ .
" నాకు ఒక ఐడియా వచ్చింది రా " అన్నాడు శేఖర్ .
" ఏమిటో చెప్పు .... "
" రేపు మీ ముగ్గురు మా ఇంటికి రండి మా ఇంట్లోనే చేసుకుందాం " అన్నాడు శేఖర్ .
" నీకు ఏమైనా మతి గాని పోయిందా ... చికెన్ తినాలనే పిచ్చి పట్టి " అన్నాడు రాజు .
" ముందు నేను చెప్పేది వినండి రా మా ఇల్లు మన కాలనీలో కొంచెం వేరుగా , దూరంగా ఉంటుంది కదా . చుట్టుపక్కల ఇల్లు కూడా లేవు .... "
" అయితే ... "
" చెప్పేది పూర్తిగా వినండి ... "
" అయితే చెప్పు ... "
" రేపు లంచ్ బ్రేక్ కి ముందు మనకు ఉన్న సబ్జెక్ట్ సార్ సెలవు రాను అని ఈరోజు చెప్పారుగా . అప్పుడు మనం మా ఇంటికి వెళ్ళి చికెన్ వండుకుని తినదాం . మీలో ఎవరికైనా వండడం వచ్చా " అన్నాడు శేఖర్ .
" నాకు వచ్చు కానీ ఆంటీ కీ తెలిసిపోతుంది కదా " అన్నాడు గోపాల్ .
" లేదురా ... అమ్మ , నాన్న రేపు ఉదయం ఊరు వెళ్తున్నారు . సాయంత్రం వరకు రారు ... "
" నువ్వు ఒకటి మరచి పోతున్నావ్ . పాత్రలు మనం శుభ్రం చేస్తాం ...కానీ చికెన్ స్మెల్ వలన ఆంటీ గుర్తు పడితే ... " అన్నాడు రాజు .
" నా దగ్గర ఒక స్ప్రే ఉంది .. అది కొడితే ఇక ఏం వాసనా రాదు " అన్నాడు శేఖర్ .
" అలాగే నువ్వు చెప్పినట్లే చేద్దాం " అని అనుకొని ఇంటికి వెళ్ళి పోయారు అందరూ .
నెక్స్ట్ డే అనుకున్నట్టుగానే లంచ్ బ్రేక్ కు ముందే శేఖర్ ఇంటికి వెళ్ళారు దారి లో చికెన్ కొనుక్కుని .
చెప్పినట్టుగానే గోపాల్ చికెన్ కర్రీ చేశాడు .
అందులోకి ప్రపంచ పటంలో ఉండే దేశాల నమూనాలను తయారు చేసుకుని చికెన్ కర్రీ తో తిన్నారు .( ఏంటో అనుకొనేరు ... చపాతి ఆకారాలు అలా వచ్చాయన్నమాట 😀).
అనుకున్నట్లు గానే మొత్తం తిని గిన్నెలు కూడా శుభ్రం చేసారు .
వంట కొత్త వలన , ఇంకా మాట్లాడుకుంటూ తినడం వలన క్లాస్ స్టార్ట్ అయ్యే టైం అయిపోయింది .
మిగిలిన ముగ్గురు కంగారు పెట్టడంతో " మీరు వెళ్ళండి రా ... నేను ఇంకా శుభ్రం చేసి వాసన రాకుండా స్ప్రే చేసి క్లాసు కి వస్తాను . నలుగురం లేక పోతే ఇంటిలో తెలిసిపోతుంది " అన్నాడు శేఖర్ .
అలాగే అని ముగ్గురు స్కూల్ కి వెళ్ళిపోయారు . శేఖర్ అంతా శుభ్రం చేసుకుని నెక్స్ట్ పీరియడ్ లో వాళ్ళతో జాయిన్ అయ్యాడు .
సాయంత్రం అందరూ తాము చేసిన పనిని తలచుకుని తెగ సంతోష పడిపోయి కొంతసేపు మాట్లాడుకొని ఇంటికి వెళ్ళిపోయారు .
నెక్స్ట్ డే శేఖర్ దెబ్బల తో స్కూల్ కి వచ్చాడు .
" ఏమైందిరా ... ఎవరు కొట్టారు నిన్ను . చెప్పు వాళ్ళ దగ్గర కు వెళ్ళి మరీ తాట తీస్తాం " అన్నారు ముగ్గురు కోపంగా .
" మీరు వెళ్ళితే మీకు కూడా ఇలాగే తగులుతాయి దెబ్బలు " అన్నాడు శేఖర్ ఏడుస్తూ .
" ఎవరో చెప్పమంటే మాకు కూడా తగులుతాయి అంటావ్ ఏంట్రా " అన్నాడు బాలు .
" కొట్టింది ఎవరో చెప్పు ముందు " అన్నాడు గోపాల్ .
" మా అమ్మ .. "
" ఆంటీ నా .... ఎందుకు కొట్టారు నిన్ను " అని అడిగాడు రాజు . ఎందుకు అన్నట్టు చూసారు మిగిలిన ఇద్దరు కూడా .
" నిన్న మనం చేసింది తెలిసిపోయింది " అన్నాడు శేఖర్ ఏడుస్తూ .
" అంటే నువ్వు ఏ పనైనా సగం సగం చేస్తావు గా ... నిన్న స్ప్రే కొట్టడం మర్చిపోయావా ... " అన్నాడు బాలు .
" లేదురా కొట్టాను .... "
" మరి ఆంటీ కి ఎలా తెలిసింది ... "
" విశ్వాసం వలన ... "
" విశ్వాసం వలనా ... అర్థం కాలేదు " అన్నారు ముగ్గురు .
" ఎందుకు అర్థం అవుతుంది . వద్దు ..వద్దు .. అంటుంటే మీ ఇంటిలో పెట్టినట్టే మా ఇంటిలో మేము పెంచుకుంటున్న కుక్కకి చికెన్ బోన్స్ పెట్టారు మీరు ... "
"అయితే ... "
" అది మా ఇంటి లో పెరిగిన కుక్క రా ... అది మేము తినే పప్పు, , కూరలే అది కూడా తింటుంది . అది అరగక వాంతులు చేసుకుంది . ఆ బోన్స్ చూసి అమ్మ నాలుగు తగిలిస్తే నిజం చెప్పాను . ...
ఆ పేరు కూడా వినపడ కూడని మన ఇంటిలో ఏకంగా వండి తింటారా " అని ఎప్పుడూ కొట్టని మా అమ్మ తన ప్రతాపం మొత్తం చూపించింది అన్నాడు శేఖర్ ఏడుస్తూ .
" అంటే మేము పెట్టినప్పుడు శుభ్రం గా లొట్టలు వేసుకుంటూ తిని తరువాత నీ పరిస్థితి ఇలా అవడానికి మీ కుక్క విశ్వాసం కారణం అన్నమాట " అని నవ్వారు ముగ్గురూ .
" మా విశ్వాసం కాదురా .. దాని తప్పు ఏమీ లేదు . వద్దు వద్దు అంటుంటే వినకుందా దానికి పెట్ఝడమే కాకుండా మళ్ళీ నన్ను సగం సగం పనులు చేస్తాను అని అంటారా .. నాకు తగిలిన దెబ్బలు మీకు కూడా తగలాలిగా " అని వెంట తెచ్చుకున్న కర్ర తో ముగ్గురికి వెంట పడి మరీ తోలు తీసాడు శేఖర్ .
@@@@@@@@@
శుభం .
