తనే నన్ను

తనే నన్ను మేల్కొల్పక..తెలవారుట జరిగేనా..!?

తాను ముద్దు ఇవ్వకున్న..కలలాగుట జరిగేనా..!?

చిన్నిపాపలాగ తాను..నవ్వుతుంటె నాకిష్టం..

తన చూపుల వానలేక..నే వెలుగుట జరిగేనా..!?

మెఱుపుమబ్బు లేవంటే..చెలికనులే కురియునులే..

తన అడుగుల సడిని వినక..నేమురియుట జరిగేనా..!?

ఈ నిప్పుల ఊయలనే..కోవెలగా మలచె తనే..

తన వలపుల దీపమసలు..నే కాంచుట జరిగేనా..!?

మత్తుమందు అసలుందా..తన ఊసుల మధువుగాక..

తాను ఆలకించకనే..మరి పాడుట జరిగేనా..!?