పిచ్చి మనసు

రాత్రి వెన్నెలల నవ్వుల్లోకి చూస్తూ

మౌనంగా చీకటితోపాటు కరిగిపోతూ నేను..

నిశిరాకాసి నిశ్శబ్ధంలో చేస్తున్న భయంకర శబ్ధాన్ని పట్టనట్టు

కర్టెన్ సందుల్లోంచి వచ్చే గాలిని జోలపాటగా ఆస్వాదించి నిదరోతూ నువ్వు..

ఆ రాత్రంటే నీకు కళ్ళు మూసి తెరచేంతలో

జరిగిన ఒక ఆరేడు గంటల సుషుప్తావస్థేనేమో..

కానీ నాకు కన్నీటిని కావ్యాలుగా ఒంపుకున్న

మౌనాల్లో నిండిన అనిర్వచిత క్షణాలు..

ఆ రాత్రంటే ఎప్పటికీ తడి ఆరని గాథలను

గుండె దండంపై విఫలయత్నంగా ఆరేస్తూ

పొద్దునకల్లా పచ్చివాసనేసే భావాలను

కళ్ళల్లోనే కుక్కుకొని మరిన్ని కొత్త ఆశలను, దిగుళ్ళనూ నింపుకుంటూ

మరో రాత్రి కోసం సిద్ధపడే ఓ అలుపెరుగని పిచ్చి మనసు