ఓ జ్ఞాపకమే
ఓ జ్ఞాపకమే
మనిషికీ, జ్ఞాపకానికీ మధ్య
ఓ జీవిత కాల దూరం..
కానీ,
మనిషి ఓ జ్ఞాపకంగా మారేందుకు
క్షణమొక్కటి చాలు..
సుదీర్ఘ జీవన ప్రయాణంలో
అల్లుకున్న అనుబంధాలేవీ ఆపలేని చిరునామే..
జ్ఞాపకంగా మారడం..
అనుకుంటాం కానీ ఊపిరి ఉల్లిపొరల్ని..
ఒక్కొక్కటి ఒలుచుకుంటూ పోతే
మిగిలేది శూన్యం కాదు..
అక్కడో లేత జ్ఞాపకం చిగురిస్తుంది..
ఏ అంతానికి అంతముండదు..
ప్రతి జ్ఞాపకం రూపాంతరం చెందిన ఓ అంతమే..
మనిషి ప్రతి రోజూ కొంచం కొంచంగా చస్తుంటాడు..
తనకు తెలియకుండానే కొన్ని జ్ఞాపకాల్ని ప్రసవిస్తుంటాడు..
చివరి క్షణం మరణాన్ని ముద్దాడినప్పుడు..
మనిషి అమాంతం ఓ శాశ్వత జ్ఞాపకంగా అవతరిస్తాడు..
జ్ఞాపకంగా మిగలని జీవితం
చీకటి పొరల్లో పాతరేసిన ఉదయం..
మనిషంటే ఓ జ్ఞాపకమే..
కాలం పెట్టెలో
పట్టెడు జ్ఞాపకాల్ని దాచిపెట్టని మనిషి..
పుట్టినా పుట్టనట్టే..
చావక ముందు చచ్చినట్టే..!