నేస్తమా

సామర్థ్యపు లోతులలో..చేరాలిక నేస్తమా..! 

మది కోవెల దీపాలే..వెలగాలిక నేస్తమా..! 

వాస్తవమున జీవించే..కళ నేర్పాలా ఒకరు.. 

నీ లోపలి కణకణమున..చూడాలిక నేస్తమా..! 

ఏ ప్రధాన మంత్రి వచ్చి..ఆరోగ్యం ఇచ్చేరు.. 

ఉచితాలకు ఎగబడుటే..మానాలిక నేస్తమా..! 

నీతులన్ని నేతిబీర..నేతిసమం చూడకో.. 

విచక్షణకు చోటివ్వగ..ఆగాలిక నేస్తమా..! 

మధుశాలకు దారివెతుకు..ఉద్యోగం ఎందుకట.. 

స్వచ్ఛమైన శాంతిమధువు..గ్రోలాలిక నేస్తమా..! 

అమృతకలశ మింకెక్కడ..అంతరంగమే గాక.. 

ప్రేమకెంత బలముందో..తెలియాలిక నేస్తమా..!