జాలిలేని జాబిలి

జాలిలేని జాబిలికే..మనసిస్తే ఇచ్చానేం..! 

ప్రేమ అనే ఊబిలోన..పడిపోతే పోయానేం..! 

హాయి అనే పదమెందుకు..పనికిరానె రాదీపై.. 

వేదననే మధువులాగ..గ్రోలేస్తే గ్రోలానేం..! 

అసలు లేని కాలానికి..లెక్కలెలా కట్టగలను.. 

యుగాలనే ఓ ప్రక్కకు..నెట్టేస్తే నెట్టానేం..! 

నువ్వెవరో నాకెందుకు..నేనెవరో తెలియనపుడు.. 

నా నేనును నీలోనే..కలిపేస్తే కలిపానేం..! 

నీ ఒడిలో పసిపాపగ..ఉండటమే భాగ్యములే.. 

అమాయికత అనే తోట..పెంచేస్తే పెంచానేం..! 

అక్షరాల మెఱుపుసుధయె..తోడైనది అడుగకనే.. 

నీ ఆనతి తియ్యగనే..మీరకనే మీరానేం..!