గుండె మంట

మండే గుండెల్లో

మాయని గాయాలెన్నో ?

కడలి అలల కల్లోలంలో

తీరంచేరని బ్రతుకునావలెన్నో ?

శిథిలమైన జీవితాల్లో

పదిలమైన జ్ఞాపకాలెన్నో ?

చలించే కాలంలో

ఫలించని జీవితాలెన్నో ?

పొడుస్తున్న ఉదయాలలో

విచ్చుకోని హృదయాలెన్నో ?

ఆశల చీకటిలో

అందరాని వెలుగుపూలెన్నో ?

దైవం రాసినరాతల్లో

చిక్కుకున్నతల రాతలెన్నో ?

కనులు మూసిన రేయికి

తెలవారని బ్రతుకులెన్నో ?

నిస్పృహల నిషీధిలో

నైరాశ్యమొందే దుఃఖితులెందరో ?

పొత్తిళ్ళు కూర్చిన ఆనందంలో

ఒత్తిళ్ళు మిగిల్చిన విషాదలెన్నో ?

నిష్కపట చెమటచుక్కలురాల్చిన 

నిరాశల నులివెచ్చని కన్నీళ్ళెన్నో ?

శిశిరం ముసిరిన జీవితతరువులకు

వసంతం విరియని తనువులెన్నో ?

ప్రశ్న నుండే ఉద్భవించిన ప్రగతి

ప్రశ్నైమిగిలిన జీవితాలకేల ఈ గతి ?

             

‌... సిరి ✍️❤️