గజల్ -1

రచన : @డి.ఎన్.వి. రామశర్మ‌

శీర్షిక : గజల్ రూపం..7-7-7-7

మాయచేసీ ఉన్నవన్నీ *తోడుకెళ్ళే నలుగురెవరో*

ఏనాటికీ వీడకుండా *తోడువెళ్ళే నలుగురెవరో*

తప్పలేకా దాటలేనీ క్లిష్టదారిన చేరుకుంటే 

స్నేహంగాను వారిదరికే *తీసుకెళ్ళే నలుగురెవరో*

పుణ్యమంతా తరాజులోనె కనిపించేను దూరమైనా 

నిశిరాతిరిని పిడికిలిపెట్టి *తోసుకెళ్లే నలుగురెవరో*

వెనుదిరగనీ శక్తిమేరకు చేసినట్టీ దానధర్మం

మరచిపోకా మాలగానే *వేసుకెళ్ళే నలుగురెవరో*

తిరిగెపుడైనా ఆశించనీ నిస్వార్ధమై నిలిచేవుగా

గురుతులన్నీ ఎదసంచిలో *పోసుకెళ్ళే నలుగురెవరో*

నువ్వులేనీ క్షణమొకటైన లేదులేదని నీచెంతనే

మౌనంగానె పంక్తిబోనం *చేసుకెళ్ళే నలుగురెవరో*

శ్వాసలేనీ జీవనయాత్ర తప్పదంటూ రామునిమాట

నీవెంటేగ మేమంటూనె *మోసుకెళ్ళే నలుగురెవరో*