దిగువ మనిషి

డిగ్రి చేతిలో బట్టిన దిగువ మనిషి 

తాను చదివిన చదువుకు తగ్గ పనులు

దొరక లేకీ గుమాస్తాగ దొరలు చుండి 

బ్రతుకు బండిని లాగుచు వెతలు పొంది

యాలు బిడ్డల పోషించ

నలసి పోయి

ఱెక్కలరిగించి యెముకలు కరగదీసి

పిల్లగాండ్లకు చెప్పించి పెద్ద చదువు

మునిగి పోయినాడు 

చూడరో!మనికి లేక.

ఱెక్క లొచ్చిన పిల్లలు రివ్వు మనుచు

పక్షులై వెళ్లి తమకేమి పట్టనట్లు

చూడ కుండిరి వెనుకకు చోద్య మకట!

ధనము కరిగెను రోగము దాపురించె

యింటి యిల్లాలు గతియించ నొంటి బ్రతుకు 

ముందు ముందు జీవితమున ముక్తి లేక 

బరువు లెన్నియో మోయగా వడలిపోయి 

వృద్దుడైనట్టి మానిసి విసుగు చెంది 

గడుపుచుండనీ వయసున గాసిపడుచు

వేదనా భరితముగనీ బెదురు బతుకు

నీడ్చు చుండెను దిగులుగా నేడ్వలేక

మహిని సాగెను చింతతో మనిషి గాథ

బతుకు జట్కా బండి

వలెను గతుకు లందు

మళ్ళి చివరకు మిత్తితో వెళ్లి పోవు./