தொலையாத தேடல்

என்றோ...எப்போதோ.... எங்கோ...

ஏதோ ஒன்றை - இன்னதென்று அறுதியிட்டு சொல்ல இயலாததை

தொலைத்து விட்ட போதும்

தொலைந்ததை ஏற்றுக் கொள்ளா

பாழும் மனம் ....

இருட்டு அறையில்

குருட்டு கண்களைப் போல்

அலைபாய்ந்து - தேடி ஓய்ந்து

மயங்கிச் சரிகையில்

கண்முன் நிழலாடும்

வண்ணப் பூச்சிகளாய் !

தேடித் தேடி ஓய்ந்தாலும்

கிடைக்கப் போவதில்லை -

இந்த நிதர்சனம் உறைத்தாலும்

ஏனோ -

தேடல் மட்டும் தொலைவதே இல்லை!