சிலுவை சுமக்கும் மகவுகள்

வேண்டாம் ...

போதும் பொண்ணு ....

வேண்டா மணி ....

போதும் பொண் போது ....

வேண்டா வரம் ....

வேண்டா அமிர்தம் .....

வேம்பு .....

எத்தனை வெறுப்பும் ஏமாற்றமும் !

ஏன்?

கருவில் பத்து மாதம் சுமந்த பிள்ளை

பெண் மகவென்றதும்

ஏனோ இத்தனை வெறுப்பு ?

பெற்றவர்களின் உதிரத்தில் விளைந்த

உன்னதம் தானே இம்மகவும் ?

பின் ஏனிந்த ஓரவஞ்சனை ?

ஏமாற்றம் - எதற்கோ?

எதிர்பார்ப்பது பெற்றவர்கள் பிழையன்றோ?

பெற்றவர் செய்யும் பிழைக்கு

ஒன்றுமறியா கிள்ளைக்கு

ஏன் தண்டனை ?

பெற்றவர் செய்யும் பாவம் -

எதிர்பார்ப்பு - ஏமாற்றம் - பேராசை

இவற்றின் விளைவு -

சிலுவை சுமக்கும் பெண் மகவுகள் !

மனதில் சுமக்கும் வலிகளின் பாரமும்

சிலுவைப் பாரத்திற்கு சமமாகாதோ?

இந்த பாரம் தீர வழியும் உளதோ?