କେମିତି ସହିବି ତାହା

ତୁମ ପରେ ଏତେ ଭରସା କରି ମୁଁ

ଭୋଗିଲିଣି କେତେ ସଜ୍ଜା ,

ଏ ମରମ କଥା ଆଉ କେ ଜାଣିଲେ

ଉଡ଼େଇବେ ତୁମ ମଜା...

କେମିତି ସହିବି ତାହା ;

ମୋହ ଲାଗି ତୁମ ଯଶରେ କଳଙ୍କ

ନ ଲାଗୁ ହେ ଚଉବାହା ।(ଘୋଷା)

ହତାଦର ମୋତେ କଲେ କର ପଛେ

ଦେଲେ ଦିଅ ଯେତେ କଷ୍ଟ ,

ତଥାପି ତୁମକୁ ଭଜୁଥିବି ନିତି

ଭକ୍ତିଭରେ କରି ଇଷ୍ଟ ।

ନେଲେ ନିଅ ଯେତେ ପରୀକ୍ଷା ମୋହର

ଭାବନା କରିଛ ଯାହା ।(୧)

ମୋହ ଲାଗି ତୁମ ଯଶରେ କଳଙ୍କ

ନ ଲାଗୁ ହେ ଚଉବାହା ।

ଏ ଜନମେ ହେତୁ ପାଇବା ଦିନରୁ

ତୁମକୁ ଦେଇଛି ମନ ,

ଆପଣାପଣର ସୁଯୋଗ ଉଠେଇ

ମାଗିନାହିଁ ଧନ, ଜନ ।

କହିନାହିଁ ଦିଅ ସରଗର ସୁଖ

ମୋ ଲାଗି-ଅଲୋଡ଼ା ତାହା ।(୨)

ମୋହ ଲାଗି ତୁମ ଯଶରେ କଳଙ୍କ

ନ ଲାଗୁ ହେ ଚଉବାହା ।

ଦେଲେ ଦିଅ ତୁମ କୃପାରୁ କଣିକେ

ପାଇଲେ ମୁଁ ଯିବି ତରି ,

କଣିକାଏ ତହୁଁ ଊଣା ହୋଇଗଲେ

ଭଣ୍ଡାର କି ଯିବ ସରି !

ତୁମ କିରତିରେ ବାଧା ପଡ଼ିବ କି

ମୋତେ ହେଲେ ବାରେ ସାହା ।(୩)

ମୋହ ଲାଗି ତୁମ ଯଶରେ କଳଙ୍କ

ନ ଲାଗୁ ହେ ଚଉବାହା ।।

ବି. ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।