କେତେଦିନ

କେତେଦିନ ସାଉଁଟୁ ଥିବି

ସେ ଶୁଖିଲା ଗୋଲାପ ପାଖୁଡା ସବୁକୁ

ଯାହା ତୁମେ ଧରେଇ ଥିଲ ମୋ

ହାତରେ କେତେ ପ୍ରତିଶୃତି

ଦେଇ ଅଧରେ ଚୁମିଥିଲ ମୋ ହାତକୁ।

କେତେଦିନ ଆଉ ପଢୁଥିବି

ତୁମର ସେ ପୁରୁଣା ହାତଲେଖା

ଚିଠି ସବୁକୁ ଲୁଚେଇ ଲୁଚେଇ

ଝରାଉ ଥିବି ଧାର ଧାର ଉଷୁମ ଲୁହ।

କେତେଦିନ ଦେଖୁଥିବି ତୁମ 

ପ୍ରତିଛବିକୁ ବହି ଭିତରେ ରଖି

ଅଧା ଆଲୁଅ କେବେ ତକିଆ ତଳେ

ତ କେବେ ବନ୍ଦ ପଲକରେ।

କେବେ ଦିନ ଲେଖୁଥିବି ବିରହ

ବିଚ୍ଛେଦର କବିତା ତୁମକୁ ବସାଇ

ମୋ ଭାବନା ରାଇଜରେ ଲେଖି

ପୁଣି ଚିରୁଥିବି ଫର୍ଦ୍ଦ ଫର୍ଦ୍ଦ ମୋ ଡାଇରୀକୁ।

କେତେଦିନ ଆଉ ଢେଉଛୁଆଁ

ବାଲିରେ ଆଙ୍କୁଥିବି ପ୍ରେମ

ଚିତ୍ର ଆବଦ୍ଧ କରି ତୁମରି ନାଁ କୁ

ମୋ ନାଁ ସାଥେ ମିଶାଇ।