ରଙ୍ଗମଞ୍ଚ
ରଙ୍ଗମଞ୍ଚ
ଲୋକାରଣ୍ୟ ବଡ ଘଞ୍ଚ ବନ୍ଧୁର ଏ ପଥେ
ଦୁନିଆଁ ଯେ ରଙ୍ଗମଞ୍ଚ ଜୀବନ ନାଟକେ ,
ସହି ଯେତେ ପ୍ରତିଘାତ ଦେହର ଏ ରଥେ
ଅବରୁଦ୍ଧ ପ୍ରାଣ ବାତ ନିଃଶ୍ୱାସ ଫାଟକେ ।
ଯୁଗଧର୍ମେ ମତିବାନ ସଭ୍ୟତା ପ୍ରତୀକ
ପଦାର୍ପଣେ ଗତିବାନ ରଙ୍ଗ ଭୂମି ତଳେ ,
ନବରସେ ଛନ୍ଦ ତୋଳି ପରଷେ ରତିକ
ଭୂମିକାର ରଙ୍ଗ ବୋଳି ଅଭିନୟ ବଳେ ।
ପରିପାଟୀ ନାନା ବେଶ ଭୂମିକାକୁ ଲେଖି
ଭ୍ରୂକୁଟି ନଚାଇ ଲେଶ ଭାବ ଯେ ପ୍ରକାଶ ,
ମନ୍ତ୍ର ମୁଗ୍ଧ କରେ କଳା ଦର୍ଶକଙ୍କୁ ଦେଖି
ନିଜତ୍ଵ ପାସୋରି ଭଲା ନୈପୁଣ ସକାଶ ।
ରଙ୍ଗମଞ୍ଚେ ଲାସ୍ୟମୟୀ କୁଞ୍ଜର ଗାମିନୀ
ଅଭିନେତ୍ରୀ ହାସ୍ୟମୟୀ ପ୍ରସ୍ଫୁଟନେ ଲୀନ ,
ଶୋକର ଉତ୍କର୍ଷ ଘେନି ନିସ୍ତବ୍ଧ ଯାମିନୀ
ବିବସିତା ଯାଜ୍ଞସେନୀ ତ୍ରସ୍ତା ସାହା ହୀନ ।
ବିରସ ଭାବ ନିଯୋଗେ ଆନ୍ଦୋଳନ ଘାତ
ବିହ୍ଵଳେ ଭାଷ୍ୟ ବିଯୋଗେ ଯବନିକା ପାତ ।
ପ୍ରସନ୍ନ କୁମାର ମାଦଳା