ହସିଲେ ଆମ ଶିଶୁ ଜଗତ
ହସିଲେ ଆମ ଶିଶୁ ଜଗତ
ଏ ଦେଶର କୁନିକୁନା ଯେତେଶିଶୁ କଳିକା
ଏ ଦେଶର ଉପବନେ ଶୋଭା ନାନା ଭଳିକା ।
କାଲିକି କାଲି ରେ ସିଏ ଫୁଲ ପରି ଫୁଟିବେ
ସଉରଭ ଭରି ଦେହେ ସମୀରଣେ ଲୋଟିବେ ।
ଦରିଆ ରେ ବୁଡି ବୁଡି ପାଣି ପଙ୍କ ମାପିବେ
ଆକାଶ ରେ ଉଡିଉଡି ଗ୍ରହ ତାରା ଦେଖିବେ ।
ପାହାଡ଼ରେ ଚଢି ପୁଣି ସମତଳେ ଚାହିଁବେ
ନଈ ନାଳ ବିଲବଣ ଏକାକାର ଭାବିବେ ।
ତାଙ୍କରି ସବୁରି ଦେହେ ଏକା ନାଲିରକତ
ଦେଶ ସେବା ପାଇଁ ସର୍ବେ ହୋଇ ଅନୁପ୍ରାଣିତ ।
ଜନ୍ମମାଟି ଗଉରବ ତାଙ୍କପାଇଁ କାମ୍ୟ
ସେମାନଙ୍କ ହୃଦୟରେ ଭରି ଅଛି ସାମ୍ୟ ।
ସେମାନଙ୍କ ଦେହେ କେଉଁ ଅଙ୍ଗ ନୁହେଁ ନ୍ୟୂନ
ପ୍ରତିଟିର ସମାହାରେ ଶିଶୁ ପରିପୂର୍ଣ୍ଣ ।
ସେମାନେ ପରା ଆମର କୋଟି ଶିଶୁ କଳିକା
ଭାରତର ଉପବନେ ଯେତେ ଭଳି ଭଳିକା ।
ଯେବେ ହସିବ ଆମ ସାରା ଶିଶୁ ଜଗତ
ତେବେ ଯାଇ ହସିବରେ ଆମ ଦେଶ ଭାରତ ।