ପଢିବାକୁ ଦିଅ ଛାଡ଼ି
ପଢିବାକୁ ଦିଅ ଛାଡ଼ି
ଦୀପା ସିପୁ ବସି ପାଠ ପଢ଼ୁଥିଲେ
ଦୀପାକୁ ଡାକିଲା ଆଈ
କହିଲା, ହଇଲୋ ପାଠ ତୁ କାହିଁକି
ଭାଇ ପାଖେ ପଢ଼ୁ ଯାଇ ?
ପାଠ ପଢ଼ି ତୁହି କି ଲାଭ କହିଲୁ
ସରଗ କାହାକୁ ନବୁ
ଝିଅ ହୋଇ ଯଦି ପାଠ ତୁ ପଢ଼ିବୁ
ଖାଲି ବଦନାମ ହବୁ ।
ଘର କାମ ତେଣେ କାହିଁରେ କେତେଯେ
ସେକଥା ଦିଶୁନି ତତେ
ପାଠ ପଢ଼ି ଭାବୁ ଡାକତର ହବୁ
ମରଣ ନାଇଁଲୋ ମତେ !
ଆର ଘରେ ଥାଇ ସବୁ ଶୁଣୁଥିଲେ
ମୋ ମାଉସୀ ପୁଅ ଭାଇ
ପଦାକୁ ଆସିକି କହିଲେ , ହଇଲୋ
ପାଗଳୀ ହେଲୁ କି ଆଈ ?
ଝିଅ ମାନଙ୍କୁ ତୁ କଅଣ ଭାବୁଛୁ
ନାହିଁତ ସେ ଯୁଗ ଆଉ
କିଛି ନ ଜାଣିକି ଦୀପାଟା ଉପରେ
ହେଉ ଖାଲି ରାଉରାଉ !
ଆଜିକା ଯୁଗରେ ପୁଅ ଠାରୁ ଝିଅ
କେଉଁଠି କଅମ ନୁହେଁ
ଇଚ୍ଛାଶକ୍ତି ଥିଲେ , ସୁଯୋଗ ପାଇଲେ
ଜହ୍ନ ରାଇଜକୁ ଛୁଏଁ ।
ପୁଅ ଝିଅ କିଛି ଫରକ ନ ଦେଖି
ପଢ଼ିବାକୁ ଦିଅ ଛାଡ଼ି
ଝିଅ ଖାଲି ଘର କାମ ଯେ କରିବ
ଏକଥା ମନରୁ କାଢ଼ି ।
ଶିଶିର କୁମାର ପଣ୍ଡା
କୁଆଁସ , ମେରଦା କାଟିଆ
ଯାଜପୁର