ସଙ୍ଗରୋଧର ସମୟ-୪

ଲକଡାଉନର ସମୟ।ସମସ୍ତଙ୍କୁ ରହିବାକୁ ହେବ ଘରେ।ପୋଲିସ ପଇଁତରା ମାରୁଚି।ବିନା କାରଣରେ ବାହାରେ ବୁଲୁଥିବା ଲୋକଙ୍କୁ ମାରପିଟ କରୁଚି।

ଏମିତି ଜଣେ ଲୋକକୁ ପୋଲିସ ଅଟକେଇଲା ପୋଲିସ:"କାହିଁକି ବାହାରେ ବୁଲୁଚ?ଘରେ ରହିବାକୁ ନିର୍ଦେଶ ଅଛି।ଜଣା ନାହିଁ?"

-"ଜାଣିଛି।"ଲୋକଟି ନିର୍ବିକାର ଭାବେ କହିଲା।

-"କେଡ଼େ ଗଉଁ ଦେଖଉଚି ଶଳା।"ଧରିଥିବା ରୁଲ ବାଡ଼ିରେ ପୋଲିସ ଜଣକ କଷି ଦେଲା ପାହାରେ,"ଯା ଘରକୁ।"

ଲୋକଟି ଯନ୍ତ୍ରଣାରେ ଚିତ୍କାର କରି ଉଠିଲା-"ମାଆ ଲୋ"

ପୋଲିସ ଜଣକ ପୁଣି କଷି ଦେଲା ଆଉ ପାହାରେ-"କରୋନା ଏଠି ଅସମ୍ଭାଳ କଲାଣି।ଶଳେଙ୍କର କେୟାର ନାହିଁ।ଯା.... ଘରକୁ।"

ଲୋକଟି ଆଉ ସମ୍ଭାଳି ପାରିଲା ନାହିଁ-"ମୋର ମୁଣ୍ଡ ଗୁଞ୍ଜିବାକୁ ଘର ନାହିଁ।"

ଘର ନ ଥିବା ଲୋକକୁ ଘରକୁ ଯା କହି ମାଡ଼ ମାରିଥିବା ପୋଲିସ ଜଣକ ନିର୍ବାକ ହୋଇ ଚାହିଁ ଥିଲା ଲୋକଟିକୁ।