ପାଦ ଚିହ୍ନ

ଟିକେ ଆଗରୁ ଘର ଚଟାଣରେ ଲାଗିଥିବା ଅସନା ପାଦର ଦାଗ ପୋଛା ପୋଛି କରିଦେଲା ପରେ ଆଉ ନାହିଁ। ସବୁ ଏବେ ସଫା, ପରିଷ୍କାର। ଲାଗୁଛି ଯେମିତି କେବେ ଏଠି କାହା ପାଦ ପଡ଼ି ନଥିଲା କିମ୍ବା ଦାଗ ବି ପଡ଼ିନଥିଲା।

  ବାସନ୍ତୀ ମନରେ କିନ୍ତୁ ସନ୍ଦେହର ଦାଗଟିଏ ପଡି ସାରିଥିଲା।

- " ମା' କାଲି ରାତିରେ, ଏତେ ବର୍ଷାରେ ଏଠିକି କିଏ ଆସିଥିଲା କି ?" ସନ୍ଦେହରେ ସେ ପଚାରି ବସିଲା ମାଲିକାଣୀଙ୍କୁ। କିଛି ଉତ୍ତର ନପାଇ ପୁଣି ପଚାରିଲା -" ବାବୁ କ'ଣ ଆସିଥିଲେ କି ?"

ଏତିକି ବେଳକୁ ବାସନ୍ତୀ ଉପରେ ଗର୍ଜି ଉଠିଲେ ମାଲିକାଣୀ। -"ତୁ ତୋ କାମରେ ମନ ଦେ। ବେଶୀ ବକର ବକର କରନା।ବୁଝିଲୁ ?"

    ବାସନ୍ତୀ ଏଥର ବୁଝିବାକୁ ଚେଷ୍ଟା କରୁଥିଲା କିଛି କଥା । ମାଲିକାଣୀ କେଉଁ ଆଡେ ଯିବେ ବୋଲି ଡକରା ପାଇ ଡ୍ରାଇଭର ଭାବେ ଏଠାରେ କାମ କରୁଥିବା ତା' ସ୍ବାମୀ କାଲି ରାତିରେ ଆସିଥିଲା। ତା'ରି ପାଦ ଏରୁଣ୍ଡି ଡେଇଁ ବାବୁଆଣୀଙ୍କ ଶୋଇବା ଘର ଚଟାଣରେ ପଡିନି ତ ?