ଲକ୍ଷ୍ୟ
ଲକ୍ଷ୍ୟ
ଅତୀତକୁ ଫେରି ଚାହିଁଲେ ଆଖି ପାଉନି । ରାମୁ ଆଜି ଯେଉଁ ସ୍ଥାନରେ ଅଛି,ସନା ର ସାହାଯ୍ୟ ପାଇଥିଲେ ହୁଏତ ବହୁ ପୂର୍ବରୁ ସେ ସେହି ସ୍ଥାନରେ ପହଞ୍ଚି ପାରିଥାନ୍ତା । ସନା ଏକ ସରକାରୀ ଅଫିସ ରେ ଚତୁର୍ଥ ଶ୍ରେଣୀ କର୍ମଚାରୀ ରୂପେ କାର୍ଯ୍ୟରତ ଥିଲା । ତା ସ୍ତ୍ରୀ ସୁନୀ ପୁଅ ରାମୁ ଓ ଝିଅ ରୀନା କୁ ନେଇ ତା'ର ସୁଖର ସଂସାର ଚାଲିଥିଲା । ଘର ପାଖ ସ୍କୁଲରେ ଦୁଇ ପିଲା ପାଠ ପଢୁଥିଲେ । ରୀନା ଭଲ ପଢୁଥିଲା । ରାମୁ ରୀନା ଭଳି ନହେଲେ ମଧ୍ୟ ପାଠପଢା ରେ ଖରାପ ପ୍ରଦର୍ଶନ କରୁନଥିଲା । ସନାର ଇଚ୍ଛା ଥିଲା ରାମୁ ଭଲ ପାଠ ପଢି ସରକାରୀ ଚାକିରୀ ଟିଏ କରୁ । ରୀନା ବାହା ହୋଇଗଲା ପରେ ରାମୁ ଚାକିରୀ କରିଥିଲେ ଘରର ଦାୟିତ୍ୱ ନେଇପାରିବ । ହେଲେ ସେଥିପାଇଁ ରାମୁକୁ ଭଲ ପାଠ ପଢିବାକୁ ପଡିବ । କିନ୍ତୁ ରାମୁ ପାଠପଢ଼ା ଅପେକ୍ଷା ଖେଳକୁଦରେ ଅଧିକ ଧ୍ୟାନ ଦେଉଥିଲା । ଖେଳରେ ଅନେକ ପୁରସ୍କାର ଜିତୁ ଥିବା ରାମୁକୁ ସନା ପ୍ରୋତ୍ସାହିତ କରିବା ଦୁରେ ଥାଉ ଖେଳରେ ସମୟ ନଷ୍ଟ ନ କରିବା ପାଇଁ ତାଗିଦ କରୁଥିଲା । କିନ୍ତୁ ମାଆ ଓ ଭଉଣୀଙ୍କ ସହାୟତାରେ ସେ ଖେଳରେ ଅଧିକରୁ ଅଧିକ ଭଲ ପ୍ରଦର୍ଶନ କରିବାରେ ଲାଗିଲା । ହେଲେ ସନାକୁ ଏସବୁ ଆଦୌ ଭଲ ଲାଗୁନଥିଲା ।
ସମୟ ତା'ଗତିରେ ଆଗକୁ ବଢି ଚାଲିଥିଲା । ରୀନା କୁ ଏକ ଭଲ ପ୍ରସ୍ତାବ ଦେଖି ବିବାହ ଦେଇଥିଲା । ଝିଅ ବିଦା ବେଳେ ସନା ଦୁଃଖୀ ଥିଲା ହେଲେ ଠିକ ସେତିକିବେଳେ ରାମୁର ଏସ.ଏସ.ସିର ରେଜଲ୍ଟ ଆସିଥିଲା । ରାମୁ ସରକାରୀ ଚାକିରୀଟିଏ ପାଇଥିବାରୁ ସନା ବହୁତ ଖୁସି ହୋଇଥିଲା । ସମାନ ସହରରେ ରାମୁର ଅଫିସ ହୋଇଥିବାରୁ ସବୁ ସୁବିଧା ହୋଇଥିଲା । କିନ୍ତୁ ରାମୁ ଖୁସି ଥିବା ପରି ଜଣାପଡୁନଥିଲା । ଦିନେ ସନା ରାମୁ ସହିତ ଏ ବିଷୟରେ କଥା ହେଲା । ରାମୁ ପ୍ରଥମେ କିଛି କହି ନଥିଲା । ପରେ ସାହସ ସଞ୍ଚୟ କରି କହିଥିଲା,"ବାପା ମୁଁ ଖେଳରେ କ୍ୟାରିଅର ଚାହେଁ । ଏ ଚାକିରୀରେ ମୁଁ ଖୁସି ନୁହଁ । କେବଳ ଆପଣଙ୍କ ମାନ ରଖିବା ପାଇଁ ଏ ଚାକିରୀ କରିଥିଲି । ମୋ ପାଇଁ ଆପଣଙ୍କ ଠାରୁ ବଡ଼ କେହି ନୁହଁନ୍ତି । ଆପଣ ଅନୁମତି ଦେଲେ ମୁଁ ଦୁଇ ମାସ ମୋ ଇଛା ପୁରଣ କରିବା ପାଇଁ ଚେଷ୍ଟା କରିବାକୁ ଚାହୁଁଛି । ଯଦି ବିଫଳ ହେବି ଏହି ଚାକିରୀ କରି ଜୀବନ ବିତେଇ ଦେବି । ଜୀବନରେ କେବେ ଅନୁଶୋଚନା ରହିବ ନାହିଁ ଯେ ମୁଁ ଚେଷ୍ଟା କରିନଥିଲି । ରାମୁର ଏହି କଥା ଶୁଣି ସନା ଭାରି ମନରେ ତାକୁ ହେଉ କହି ସେଠାରୁ ଚାଲିଆସିଲା ।
ତାପର ଦିନ ରାମୁ ଘର ଛାଡ଼ି ଚାଲିଗଲା । ମାସେ ପର୍ଯ୍ୟନ୍ତ ତା'ର କିଛି ଖୋଜ ଖବର ନଥିଲା । ତାପରେ ହଠାତ ଦିନେ ସମ୍ବାଦ ପତ୍ରରେ ରାମୁର ଫୋଟୋ ଦେଖି ସନା ଚମକି ପଡିଲା । ସେଥିରେ ଲେଖାଥିଲା ଅଧିନାୟକ ରାମ ସାହୁଙ୍କ ଉଚ୍ଚକୋଟୀର ପ୍ରଦର୍ଶନ ଯୋଗୁଁ ଭାରତୀୟ ଫୁଟବଲ ଦଳ ବିଶ୍ଵ ଚମ୍ପିୟାନ । ସନା ନିଜ ଆଖିକୁ ବିଶ୍ୱାସ କରିପାରୁ ନଥିଲା । ରାମୁ ର ପ୍ରତିଭା ବିଷୟରେ ସେ ସମ୍ପୁର୍ଣ ଅଜ୍ଞ ଥିଲା । ଘରକୁ ଫେରିଲା ପରେ ଘର ସାମ୍ନାରେ ସାମ୍ବାଦିକଙ୍କ ଲମ୍ବା ଧାଡି ଦେଖି ନିଜ ଆଖିକୁ ବିଶ୍ୱାସ କରିପାରୁ ନଥିଲା । ତାକୁ ଦେଖିବା କ୍ଷଣି ତା ଆଡ଼କୁ ରାମ ସାହୁଙ୍କ ବାପା କହି ସାମ୍ବାଦିକ ମାନେ ଦୌଡ଼ି ଆସିଲେ । ରାମୁ ବିଷୟରେ ତାକୁ ଅନେକ ପ୍ରଶ୍ନ କରିଥିଲେ । ସେମାନଙ୍କ ପ୍ରଶ୍ନର ଉତ୍ତର ଦେଲା ବେଳେ ସନାର ଛାତି କୁଣ୍ଢେ ମୋଟ ହୋଇଯାଉଥିଲା । ସମସ୍ତେ ତାକୁ ରାମ ସାହୁର ବାପା କହିଲା ବେଳେ ସେ ଗର୍ବରେ ଫୁଲି ଉଠୁଥିଲା ।
ଏହାର ଦୁଇ ଦିନ ପରେ ରାମୁ ଘରକୁ ଫେରିଥିଲା । ମାଆ ବାପାଙ୍କୁ ପ୍ରଣାମ କରି ସନ । କୁ ଏକ ଲଫାପ । ଦେଇଥିଲା । ଯେଉଁଥିରେ ସେ ଆଇ. ଓ.ସି.ଏଲ ରେ ମ୍ୟାନେଜର ରୂପେ ଯୋଗ ଦେବାପାଇଁ ନିଯୁକ୍ତି ପତ୍ର ରହିଥିଲା । ନିଜ ଲକ୍ଷ୍ୟ ସାଙ୍ଗକୁ ଉଚ୍ଚ ସରକାରୀ ଚାକିରୀ ପାଇ ବାପା ଙ୍କ ଲକ୍ଷ୍ୟପୁରା କରିଥିବାରୁ ରାମୁ ମଧ୍ୟ ଖୁସି ଅନୁଭବ କରୁଥିଲା ।