ଜଣେ ନିରୀହର ପ୍ରଶ୍ନ.....

ଜଣେ ନିରୀହର ପ୍ରଶ୍ନ

ମାଆ ସେମାନେ ଆସି ଆମ ଘର ଭାଙ୍ଗିଦେଲେ ଏବେ ଆମେ କଣ କରିବା ଯେ

କଣ ଆଉ କରିବାରେ ଧନ ଆମେ ଆଉ ଗୋଟେ ନୂଆ ଜାଗାକୁ ପଳେଇବା ସେଠି ଆଉଥରେ ଆମ ନିଜର ନୂଆ ଘର ଗୋଟେ ତିଆରି କରିବା

ମୁଁ ଜାଣିଛି ସେମାନେ ପୁଣି ଥରେ ଆସି ସେଠି ବି ଆମ ଘର ଭାଙ୍ଗିଦେବେ କେତେ ଜାଗା ଏମିତି ବୁଲୁଥିବା ଯେ

ଆଉ କଣ କରିପାରିବା ରେ ଧନ ସେମାନେ ବୋହୁତ ଶକ୍ତିଶାଳୀ ନା ଆମେ ଚାହିଁଲେ ବି ତାଙ୍କର ବିଶେଷ କିଛି କରିପାରିବାନି

ଆମେ କଣ ତାଙ୍କ ଘର ଭାଙ୍ଗିବାକୁ ଯାଉଛୁ କି ତାହେଲେ ସେମାନେ କାହିଁକି ଆମ ଘର ଭାଙ୍ଗିବାକୁ ଆସୁଛନ୍ତି ଯେ ଘର ବି ଭାଙ୍ଗୁଛନ୍ତି ଆଉ ଆମର ଏତେ କଷ୍ଟରେ ସଞ୍ଚିତ ସମ୍ପତ୍ତି ବି ସବୁ ଲୁଟି ନେଉଛନ୍ତି

ହଁ ରେ ଧନ ହେଲେ ତୁ ବେଶୀ ମନ ଦୁଃଖ କରେନି ଆମେ ଆହୁରି ପରିଶ୍ରମ କରିବୁ ପୁଣିଥରେ ସଞ୍ଚୟ କରିବୁ କିଛିଦିନ ପରେ ଆଗକୁ ଆଉ କିଛି ଅଭାବ ରହିବନି

କେତେ ଏମିତି ପରିଶ୍ରମ କରୁଥିବା ଯାହାର ଫଳ ଆଉ କିଏ ପାଉଥିବ

ସେତେଦିନ ଯାଏଁ କରୁଥିବା ଯେତେଦିନ ଯାଏଁ ଆମର ସାମର୍ଥ୍ୟ ଅଛିରେ ଧନ ଏଇ ପରିଶ୍ରମ କରିବା ତ ହେଲା ଆମର ଧର୍ମ

ଆଉ ତାହେଲେ ତାଙ୍କର ଧର୍ମ କଣ ପର ଜିନିଷ ଚୋରି କରିକି ନେଇ ନିଜ ଭଗବାନଙ୍କୁ ତୁଷ୍ଟ କରିବା ସତରେ କଣ ତାଙ୍କ ଠାକୁର ଏୟା ଚାହୁଁଥିବେ

ତାଙ୍କ ଠାକୁର ଯିଏ, ସିଏ ଆମର ବି ତ ଠାକୁର ରେ ଧନ ଆମେ ସମସ୍ତେ ସେଇ ଏକା ଈଶ୍ୱରଙ୍କର ସନ୍ତାନ

ତାହେଲେ ସେଇ ଈଶ୍ୱର କଣ ଏଇୟା ଚାହୁଁଛନ୍ତି ଯେ ତାଙ୍କର ଜଣେ ସନ୍ତାନ ଆସି ଆଉ ଜଣେ ସନ୍ତାନର ଘରଦ୍ବାର ସବୁ ଉଜାଡି ଦେଇ ଯେତେକ ସମ୍ପତ୍ତି ସବୁ ଚୋରି କରି ନିଅନ୍ତୁ

ନା ରେ ଧନ ସିଏ ତ ସମସ୍ତଙ୍କର ଭଲ ଚାହାନ୍ତି ନିୟମ ତ ସବୁ ଏଠି ଏଇମାନେ ହିଁ ତିଆରି କରନ୍ତି

ଭୋକ ହେଲାଣି ଲୋ ମାଆ

ରହରେ ଧନ ତୁ ବେସ୍ତ ହୋ'ନି ଏଇଠି ବସିଥା ମୁଁ ସାଙ୍ଗେ ସଙ୍ଗେ ଯାଇଁ ତୋ ପାଇଁ କିଛି ଖାଇବାର ବ୍ୟବସ୍ଥା କରୁଛି

ଆଚ୍ଛା ମାଆ ସେ ଠାକୁର କୋଉଠି ଦେଖା ହେବେ ଯେ ମତେ ତୁ ଥରେ ତାଙ୍କ ପାଖକୁ ନେଇ ଯାଆନ୍ତୁନି

କାହିଁ କଣ ହେଲା କି ମୋ ଧନର

ତାଙ୍କୁ ଖାଲି ମୁଁ ଗୋଟିଏ କଥା ପଚାରନ୍ତି ଲୋ... ସତରେ କଣ ସେ ମଣିଷ ମାନଙ୍କୁ କହିଛନ୍ତି ଯେ ସେମାନେ ଏମିତି ଆସି ଆମ ମହୁପୋକ ମାନଙ୍କର ବସା ଉଜାଡି ଦେବେ.. ଆଉ ଆମ ପରିଶ୍ରମର ସଞ୍ଚିତ ଖାଦ୍ୟ ଯେତେକ ତାଙ୍କ ନିଜପାଇଁ ଆସି ଚୋରି କରି ନେଇଯିବେ ସତରେ