ଟଙ୍କା ଗଛ

ଟଙ୍କାଗଛଟିଏ ଲଗାଇଛି ମୁହିଁ ଗୋଲାପୀ ରଙ୍ଗଟି ତା'ର,

ପ୍ରତିମାସ ସିଏ ସୁନା ଅଣ୍ଡାଦିଏ ପୂରିଯାଏ ଘର ମୋର ।

ଟଙ୍କାଗଛ ଯାଏ ବାଇକ ଚଲେଇ ତା' ପାଶେ ସମୟ ନାହିଁ,

ଗଛର ପୁଆଟି ଅଯତ୍ନରେ ବଢ଼େ ତା'ପାଇଁ ରଖିଛି ଧାଈ ।

ବରଷରେ ଅଧା ଛୁଟିଥାଏ ତା'ର ଘରେ ଲାଗେନାହିଁ ମନ,

ଗଛ ବୋଲମାନି ସେବା କରେ ତା'ର ନିଜକୁ ମଣେନା ହୀନ ।

ବୁଝି ଯାଇଛି ମୁଁ ଟଙ୍କାଗଛ ଥିଲେ ଆସୁଛି ସୌଭାଗ୍ୟ ସୁଖ,

ଟଙ୍କାଗଛ ଥିଲେ ଅଭାବ ନ ଥାଏ ମେଣ୍ଟିଯାଏ ଧନ ଭୋକ ।

ବଣର ଗଛ କି ଗାଈର ଵାଛୁରୀ ବଳେବଳେ ହୁଏ ବଡ଼,

ସେହିପରି ମୋର ପିଲା ବି ବଢିବେ କୋଠା ହେବ ମୋର ନୀଡ଼ ।

ସଞ୍ଚୟ ଧନରୁ କିଣିବି ପାଠକୁ ଆଣିବି ବଣରୁ ହାତୀ,

ସେହି ମୋରଧନ ସେହି ମୋରମାନ ଚାଲେ ମୁଁ ଫୁଲେଇ ଛାତି ।