ଟିକିଏ ଶୁଣିଯାଅ

କାନ ଡେରିଟିକେ ଶୁଣ ମୋର କଥା

କାହିଁକି ଯାଉଛ ଚାଲି

ତୁମେ କି ଜାଣିନ ତୁମକୁ ମୁଁ ସଖୀ

କେତେ ଭଲପାଏ ବେଲି?

କହିବାକୁ ଅଛି କେତେ କଥା ସଖୀ

ଶୁଣିବକି ନାହିଁ କୁହ? 

ନହେଲେ ଜାଣିଛ ମନଦୁଃଖେ ମୋର

ଆଖି ଝରାଇବ ଲୁହ I

ମନେ କି ପଡୁନି ପହିଲି ଦେଖାର

ପହିଲି ପହିଲି ଛୁଆଁ

ସାଗର ବାଲିରେ ଲୋଟିଥିଲା ମନ

ଦେହେ ଲାଗିଥିଲା ନିଆଁ I

ତୁମରି ଦେହର ଚାରୁ ଚିତ୍ରପଟେ

ଲେଖିଥିଲି ଗୋଟେ ଗୀତ

ତୁମେ କହିଥିଲ ମୋ କାନରେ ଯାହା

ମନ ହୋଇଥିଲା ପ୍ରୀତ I

ଭଲକଲ ତୁମେ ସଅଳ ଆସିଲ

ପ୍ରୂତିଫୁଲ ହାତେ ଧରି

ଏକାକରି ଆଉ ଯାଅନାହିଁ ସଖୀ

ହୃଦୟ ପଥର କରି I

ଫିକା ଫିକା ଏଇ ଜହ୍ନ ଆଲୁଅରେ

ହାତରେ ହାତକୁ ରଖୀ 

ଆନନ୍ଦେ ଗାଇବା ଯୁଗଳ ସଙ୍ଗୀତ

ଆସ ଆସ ପ୍ରିୟ ସଖୀ I