ତଥାପି ଜୀବନ ରହିଛି ବାକି

ସଂଘର୍ଷ ମୟ ଜୀବନର ପଥ 

କଣ୍ଟକିତ ଏଠି ଚଲାପଥ

ଜୀବନ ନୁହଁଇ ଗୋଲାପର ଶେଯ

ଜୀବନ ଯୁଦ୍ଧ ରେ ଲଢିବାକୁ ହେବ।

ଉଠାଣି ଗଡାଣି ଜୀବନ ପଥରେ

ଭାସି ଭାସି ଯାଉ ପତର ପରାଏ

ସୁଖର ନଈରେ ପହଁରୁତ କେବେ

ଦୁଃଖର ସାଗରେ ଡୁବି ଯାଉ କେବେ।

ଜୀବନେ ନିଦାଘ କଷଣ ସହିଛୁ

ବରଷାର ବାରି ଧାରାରେ ଭିଜିଛୁ

ପଉଷ ଶୀତର ଜାଡକୁ ସହିଛୁ

ମୃଦୁମଳୟ ରେ ଶୀହରି ଉଠିଛୁ।

ହାରିନୁ କେବେ ବି ଜୀବନର ବାଜି

ତଥାପି ଜୀବନ ରହିଛି ତ ବାକି

ଚାଲିଛୁ ଚାଲିବୁ ଥକି ନ ପଡିବୁ

ମୁଦିବା ଆଗରୁ ଦୁଇ ଆଖି।

ତଥାପି ଜୀବନ ରହିଛି ବାକି

କଣ୍ଟକିତ ଏଇ ଜୀବନର ପଥେ

ସାହା ଏକା ଚକାଆଖି

ଜଗା ବିନା ନାହିଁ ଆନ ଗତି।