ତୋ ପୂଜା ପାଇଁ ଫୁଲଟିଏ ମୁଁ

ତୋ ପୂଜା ପାଇଁ ଫୁଲଟିଏ ମୁଁ

ହେବିରେ କାଳିଆ ଫୁଲଟିଏ ହେବି,

ମୋ ଦେହେ ମହକ ଦେ ରେ ଭରି

ରହି ତୋ ଚରଣ ତଳେ ବିତରିବି,

ତୋ ପୂଜା ପାଇଁ ଫୁଲଟିଏ ହେବି ।

ଏ ଯେ ତୋର ବିଶାଳ ଦୁନିଆଁ

ମାୟା ମୋହେ ଦୁଃଖ କିଆଁ ଭୋଗୁଥିବି

ଫୁଲ ପରି ସୁନ୍ଦର ଜୀବନ 

ନେବାକୁ ଆଶିଷ ତୋର ମାଗୁଥିବି,

ତୋ ପୂଜା ପାଇଁ ଫୁଲଟିଏ ହେବି ।

କୋମଳତା ଭରି ହୃଦେ ମୋର 

ସଂସାରର ଡାଳେ ନିତି ଫୁଟୁଥିବି,

ରୂପ ଗୁଣେ ଚହଟୁ ଥିବିରେ

ପ୍ରତିଦିନ ତୋ ପୂଜାରେ ଲାଗୁଥିବି,

ତୋ ପୂଜା ପାଇଁ ଫୁଲଟିଏ ହେବି ।

ମନେ ନ ଥିବ ଦୁଃଖ ଯନ୍ତ୍ରଣା

ପ୍ରତି ପ୍ରଭାତରେ ଫୁଟି ହସୁଥିବି,

ଦେଖି ଦେଖି ଏ ସୁନ୍ଦର ସୃଷ୍ଟି

ତୋର ନାମ ଅନ୍ତରେ ମୁଁ ଗାଉଥିବି,

ତୋ ପୂଜା ପାଇଁ ଫୁଲଟିଏ ହେବି ।

ମିଛ ମାୟା ଘେରା ଏ ଜଗତ 

ଜୀବନ ଜଞ୍ଜାଳେ କାହିଁକି ମୁଁ ଥିବି,

ତୋ ପୂଜା ପାଇଁ ଫୁଲଟିଏ ମୁଁ 

ହୁଏ ଯେବେ ଏ ଜନମେ ଧନ୍ୟ ହେବି,

ତୋ ପୂଜା ପାଇଁ ଫୁଲଟିଏ ହେବି ।