ସୁନ୍ଦର ପୁଷ୍ପ କୃଷ୍ଣଚୂଡ଼ା

  

ଧନ୍ୟରେ ଧନ୍ୟ ପୁଷ୍ପ ତୁ କୃଷ୍ଣଚୂଡ଼ା l

  କି ସୁନ୍ଦର ତୋହର ନାଲି ପାଖୁଡ଼ା ll

ପାଖୁଡ଼ା ମଧ୍ୟେ ଏକ ଧବଳ ଥାଇ l

   ସୁନ୍ଦରପଣ ତୋର ତୁଳନା କାହିଁ ll

ପାଖୁଡ଼ା ମଧ୍ୟେ ଥାଇ କ୍ଷୁଦ୍ର ଘଣ୍ଟିକା l

   ମଧୁ ହରଙ୍କ ସଙ୍ଗେ ମଧୁ ଚନ୍ଦ୍ରିକା ll

 ହରିତ ପତ୍ର ମଧ୍ୟେ ତୁ ପୁଷ୍ପ ପେନ୍ଥି l

   ମନ କହୁଛି କୃଷ୍ଣେ ପିନ୍ଧାନ୍ତି ଗୁନ୍ଥି ll

 ମଧୁର ମଧୁ କାଳେ ମଧୁର ବିଭା l    

   ବିଚିତ୍ରସୃଷ୍ଟିର ତୁ ଚିତ୍ରିତ ଶୋଭା ll

 ନାମକୁ କୃଷ୍ଣଚୁଡ଼ା ତୁହି ବୋଲାଉ l

 ରାଧିକା ଯୁଡ଼ା ଶୋଭା ତୁହି ବଢ଼ାଉ ll

 ମଧୁ ଗୁଞ୍ଜନେ ଚୁମି ବୁଲନ୍ତି ଅଳି l

    ଗହଳ ପତ୍ର ମଧ୍ୟେ ମଧୁ କାକଳି ll

 ସ୍ମରଙ୍କ ଶରେ କିବା ପଞ୍ଚ ପଲ୍ଲବ l

  ତାତ ସ୍ମରଙ୍କ ଯେଣୁ ବେଣୁମାଧବ ll

ସର୍ବ ଶୋଭାର ତୁହି ଉପମା ଖଣି l

   ଲୋଡ଼ନ୍ତି କୃଷ୍ଣଚୂଡ଼ା କୃଷ୍ଣ କାମିନୀ ll

ଫଗୁଣ ଫଗୁ ମାସେ ଫଗୁ ପରବ l

   ପ୍ରକୃତି ରାଣୀଙ୍କର ଫଗୁ ବୈଭବ ll ଶୋଭାର ଖଣି କିବା ଆଉ ବର୍ଣ୍ଣିବି l

   କୃଷ୍ଣଙ୍କୁ କୃଷ୍ଣଚୂଡ଼ା ଅଞ୍ଜଳୀ ଦେବି ll