ଲାଇବ୍ରେରୀ
ପ୍ରୋଫାଇଲ୍
ସତ କହିଲେ ଛାତି ଫାଟେ
ସତ କହିଲେ ଛାତି ଫାଟେ
କିଏ ଦେଖୁଛି କଣ ଲେଖା ଅଛି
କାହାର ଲଲାଟେ
ଖାଇବା ପାଇଁ କିଏ ଏଠି
ଦିନରାତି ଖଟେ,
କିଏ ଓୟେସ୍ କରି
ଶୋଇଥାଏ ଖାଇ ପେଟେ
କାହାକୁ କହିବା ଡର
ସତ କହିଲେ ଛାତି ଫାଟେ।
ନେଇ ଆଣି ଧୋଇ ପାରୁଛି ଯିଏ
ଚାଲିଛି ବାଟେ ବାଟେ
ଯିଏ ନ ପାରୁଛି କରି କିଛି
ବସି ଖାଲି ତଣ୍ଟି ଫଟାଇ କୁହାଟେ,
ଦେବା ନେବାର ଖେଳ ଖେଳି
କାହାର ରଙ୍ଗ ଚହଟେ
ପୁଣି କାହାର ରଙ୍ଗ ଛାଡି ବେରଙ୍ଗ
ଛଟପଟ ହୁଏ ପଢି ସଂକଟେ
କାହାକୁ କହିବାକୁ ଡର
ସତ କହିଲେ ଛାତି ଫାଟେ।
ଶୋଷ ମେଣ୍ଟାଇବାକୁ ପାଣି ଟୋପେ
ନାହିଁ କାହା ନିକଟେ
କିଏ ବୋତଲ ବୋତଲ ମଦ ପିଇ
ଦରାଣ୍ଡୁ ଥାଏ ଯେମିତି ଷଣ୍ଢଟେ,
କିଏ ଲାଞ୍ଚ ମିଛରେ ବୁଡି
ଦେଖାଇ ହୁଏ କେଡେ ସଚ୍ଚୋଟଟେ
କିଏ ସାଧୁ ସନ୍ନ୍ୟାସୀ ହୋଇ
ଝୁଲା ଭରିବାକୁ ପ୍ରବଚନ ଦିଏ
କହି ଏକ ଆତ୍ମା ସବୁରି ଘଟେ
କାହାକୁ କହିବାକୁ ଡର
ସତ କହିଲେ ଛାତି ଫାଟେ।
ନିଜର ସୁବିଧା ଦେଖି
ଜଣେ ଜଣକ ସାଥୀରେ ପଟେ
ସ୍ବାର୍ଥ ହାସଲ ହେଲା ପରେ
ସୁବିଧା ଦେଖି ଚିତା କାଟେ,
ସଲା ସୁତୁରାରେ ବାଘ ଛେଳି
ପାଣି ପିଅନ୍ତି ଏକ ଘାଟେ
କାହାକୁ କହିବାକୁ ଡର
ସତ କହିଲେ ଛାତି ଫାଟେ।
ଯାହାକୁ ଯାହା କହିଲେ
ବୁଝେନା ଜମାରୁ ମୋଟେ
ନିଜ ଜିଦ୍ ରେ ଅଟଳ ରହି
ଇୟାର ତାର ପଛ ଚିମୁଟେ,
ଯିଏ ଯାଏ ଯେଉଁ ବାଟେ
କେବେ ସେ ଆଉ ନ ଲେଉଟେ
କାହାକୁ କହିବାକୁ ଡର
ସତ କହିଲେ ଛାତି ଫାଟେ।
