ସଡ଼କ ସୁରକ୍ଷା ,ଜୀବନ ରକ୍ଷା

ଜୀବନର ପଥ ଭାରି ଅଙ୍କାବଙ୍କା 

        ଗଡ଼ାଣି ଉଠାଣି ଖାଲ ଢିପ ,

ଚାରିଦିଗ ଚାହିଁ ଚାଲିବାକୁ ପଡ଼େ

        ପଡ଼ିଯିବ କାଳେ ଅଭିଶାପ।

ରାସ୍ତାର ନିୟମ ନମାନି ଚାଲିଲେ

        କରିବାକୁ ପଡ଼େ ଜୀବନ ଭିକ୍ଷା ,

        ସଡ଼କ ସୁରକ୍ଷା, ଜୀବନ ରକ୍ଷା ।

ଚାଲୁ ଥିଲେ ବାଟ ମାନିବୁ ଆକଟ

       ବାମରୁ ଡାହାଣ ଦେଖିକି ଯିବୁ ,

ଦ୍ରୁତ ବେଗେ ଯଦି ଆସୁ ଥିବ ଗାଡ଼ି

       ଯଥେଷ୍ଟ ଦୂରକୁ ସରେଇ ଯିବୁ ।

ଦ୍ରୁତ ଗତି ସିନା ମହା ବିପତ୍ତି ରେ

       ଦୁର୍ଘଟଣା ଦିଏ ପ୍ରତ୍ୟକ୍ଷ ଶିକ୍ଷା ,

      ସଡ଼କ ସୁରକ୍ଷା , ଜୀବନ ରକ୍ଷା ।

ନିଶା ପାନ କରି ଗଲେ ଗାଡ଼ି ଧରି

        ଅଣାୟତ ହୁଏ ଜୀବନ ଗାଡ଼ି ,

ଆନମନା ହେଲେ ପଥରେ ପଥିକ

        ଅକାଳେ ଜୀବନ ଯାଏଟି ଉଡ଼ି ।

ମାତ୍ରାଧିକ ଆତ୍ମ- ବିଶ୍ବାସେ ମରଣ

         ସତର୍କତା ଦିଏ ମହତ ଦୀକ୍ଷା ,

       ସଡ଼କ ସୁରକ୍ଷା , ଜୀବନ ରକ୍ଷା ।

ଆପେ ମଲେ ବାପ ହୁଏ ଦରମରା

      ମରି ମରି ବଞ୍ଚେ ଦୁଃଖିନୀ ମାଅା ,

ଆହୁରି ଅଧିକ ଯନ୍ତ୍ରଣା ଦାୟକ

       ଯମପୁରୁ ଫେରି ଅଧା ଖଣ୍ଡିଆ ।

ପିନ୍ଧି ଶିରସ୍ତ୍ରାଣ  ଚଳାଅ ବାହନ

        ହାରିବୁ ଜୀବନ କଲେ ଉପେକ୍ଷା

         ସଡ଼କ ସୁରକ୍ଷା , ଜୀବନ ରକ୍ଷା ।