ସନ୍ତାନ ନୀରୋଗେ ମଙ୍ଗଳ ବାଞ୍ଛାଅଟେ

ପୌଷ ଶୁକ୍ଳପକ୍ଷ ତିଥି ଦଶମୀ

ନାମଟି ତାହାର ଶାମ୍ବ ଦଶମୀ ।

ସନ୍ତାନ ନୀରୋଗେ ମଙ୍ଗଳ ବାଞ୍ଛା

ଅଟେ ଏ ଦଶମୀ ସୂର୍ଯ୍ୟଙ୍କ ପୂଜା ।

ଥିଲେ ଶାମ୍ବ ନାମେ ଶ୍ରୀକୃଷ୍ଣ ସୁତ

କୁଷ୍ଠ ରୋଗରେ ସେ ଥିଲେ ପୀଡ଼ିତ ।

ଚନ୍ଦ୍ରଭାଗା ନଦୀ କୂଳକୁ ଆସି

ରବି ଉପାସନା ହୋଇ ବିଶ୍ବାସୀ ।

ସନ୍ତୋଷ ତପନ ଆରାଧନାରେ

ଉପନୀତ ଆସି ସେହି ଠାବରେ ।

ଆଶିଷ ଝରାଇ ଦେଲେ ମଥାରେ 

ହେଲେ ରୋଗମୁକ୍ତ ଶାମ୍ବ ସେଠାରେ ।

ସେହି ସ୍ମୃତି ଗାଥା କରି ସ୍ମରଣ

କୋଣାର୍କ ମନ୍ଦିର ହେଲା ନିର୍ମାଣ ।

ସୂର୍ଯ୍ୟଙ୍କ ପ୍ରତିମା ସିଂହାସନରେ

ପ୍ରଥମ ଅରୁଣ ପାଦ ଦେଶରେ ।

ପୂଜଇ ଭକତ ଭାବଭକ୍ତିରେ

ପ୍ରସିଦ୍ଧି ତା' ଅର୍କକ୍ଷେତ୍ର ନାମରେ ।

ଉତ୍କଳୀୟେ ପରମ୍ପରା ସଂସ୍କୃତି

ହୃଦୟ ମଧ୍ୟରେ ଜାବୋଡି଼ଥାନ୍ତି ।

ପ୍ରତି ଗୃହେ ଗୃହୀ ସୂର୍ଯ୍ୟ ପୂଜନ

ନାନା ପିଠାପଣା ଭୋଗ ଅର୍ପଣ ।

ଭିନ୍ନ ଭିନ୍ନ ପ୍ରତି ସନ୍ତାନ ପାଇଁ

ପିଠା, ମିଠା ନଇବେଦ୍ୟ ବାଢ଼ଇ ।

ଦୂର କରିବାକୁ ରୋଗକଷ୍ଟକୁ

ବିନତି କରଇ ସୂର୍ଯ୍ୟଦେବଙ୍କୁ ।

ଗୋଟେ ପରେ ଗୋଟେ ଘୂରି ପରବ 

ପ୍ରତି ଅଗଣାରେ ଢାଳଇ ଶୁଭ ।

ଓଡ଼ିଆ ରମଣୀ କରି ବରଣ

ଭାବଭକତିରେ ଇଷ୍ଟ ପୂଜନ ।

ପରବକୁ ମଣି ମଣି ସଦୃଶ

ପାଳଇ ହରଷେ ପ୍ରତି ବରଷ ।