ସିଧାକଥା-118 : ଗରିବ ପ୍ରତିଯୋଗିତା : -ଡକ୍ଟର କୃତ୍ତିବାସ ନାୟକ :

ଆମ ରାଇଜରେ ଗରିବ ହେବାକୁ ଚାଲିଛି ପ୍ରତିଯୋଗିତା,

ଯେତେ ଧନଥାଉ ମନଟା ଗରିବ ସ୍ୱାଭିମାନ ଲାଗେ ପିତା |

ଦରିଦ୍ର ତାଲିକା ଭିତରେ କେମିତି ନିଜ ନାମ ରହିଯାଉ,

ବାପାର ନାମରେ ଜମିବାଡ଼ି ସବୁ ପତ୍ନୀନାମେ ଘର ଥାଉ |

ବେପାର ବଣିଜ କଲେ କେ ଆମର ରଖୁଛି ହିସାବ କେତେ ?

ବସ୍ତିରେ ଖଣ୍ଡିଏ କୁଡ଼ିଆ କରିଛି ଗରିବ କହିବ ମୋତେ |

ମାଗଣା ସୁବିଧା ଶସ୍ତାରେ ଚାଉଳ ଦୟା ଅନୁଗ୍ରହ ପାଇଁ,

ମହତ ପଛକେ ଯାଉ, ମିଳୁଥାଉ ଲାଇନରେ ଠିଆହେଇ |

କେବେ ସିନା ଲୋକେ ଛତରଖିଆକୁ ଦେଉଥିଲେ ମୁଠେ ଭିକ,

ଏବେ ତ ଦରିଦ୍ର କାର୍ଡ଼ ଖଣ୍ଡିକ ଯୋଗାଇ ଦେଉଛି ସୁଖ |

ଧନରେ ଗରିବ ବୁଦ୍ଧିରେ ଗରିବ ଜ୍ଞାନରେ ଗରିବ ହେବୁ,

ମୋ ପରି ଗରିବ ଗଣିହେବ ନାହିଁ ସବୁଆଡ଼େ ମାଗୁଥିବୁ |