Library
Profile
ଶୁଭ ପ୍ରଥମାଷ୍ଟମୀ
ଶୁଭ ପ୍ରଥମାଷ୍ଟମୀ
ମାସମାନଙ୍କରେ ମାର୍ଗଶୀର ମାସ
ସାର କହେ ଗୀତାବାଣୀ ।
ପାଚିଲା ଧାନକେଣ୍ଡା ବିଲରେ ବିଜେ
ମାଆ ଲକ୍ଷ୍ମୀ ସାଆନ୍ତାଣୀ ।୧।
ସବୁ ଗୁରୁବାରେ ମାସ ମାର୍ଗଶୀରେ
ମହାଲକ୍ଷ୍ମୀଙ୍କ ପୂଜନ ।
ହୁଅଇ ନିଶ୍ଚିତ ଘରେ ଘରେ ସବୁ
ଗାଆନ୍ତି ଲକ୍ଷ୍ମୀପୁରାଣ ।୨।
ମାର୍ଗଶୀର ମାସ କୃଷ୍ଣ ଅଷ୍ଟମୀଟି
ଶୁଭ ପ୍ରଥମ ଅଷ୍ଟମୀ ।
ଜ୍ୟେଷ୍ଠ ସନ୍ତାନର ବନ୍ଦାପନା ହୁଏ
ମହାଲକ୍ଷ୍ମୀଙ୍କୁ ପ୍ରଣମି ।୩।
ଚାଉଳକୁ ବାଟି ପିଠୋଉର ଚିତା
ସୁନ୍ଦର ଭାବରେ ଦେଇ।
କଳସ ଉପରେ ଆମ୍ବଡାଳ ନାରୀ-
କେଳରେ ତାକୁ ସଜାଇ ।୪।
ହଳଦୀପତର ଏଣ୍ଡୁରି ପିଠାକୁ
ଶିଝାଇ ମଣ୍ଡଳ ପରେ।
ରଖି ଷଷ୍ଠୀ ଦେବୀ ପୂଜା ହୁଏ ଜ୍ୟେଷ୍ଠ
ବନ୍ଦାପନା ତତପରେ। ୫।
ଅର
ୁଆ ଚାଉଳ ହଳଦୀ ମିଶାଇ
ଦୁବ ବଦରୀ ପତର ।
କୁସୁମ ବନ୍ଦାଣ ସାରି ଘୃତଦୀପ
ବନ୍ଦାପନା ବିଧି କର ।୬।
ନବବସ୍ତ୍ର ପରିଧାନ କରି ଜ୍ୟେଷ୍ଠ
ସନ୍ତାନ ହୁଏ ବନ୍ଦାଇ ।
ମାମୁଁଘରୁ ଆସିଥାଏ ନବବସ୍ତ୍ର
ପ୍ରଥମାଷ୍ଟମୀର ପାଇଁ ।୭।
ଜ୍ୟେଷ୍ଠ ସନ୍ତାନର ଶୁଭ ମନାସନ୍ତି
ସର୍ବେ ଏ ଶୁଭ ଦିନରେ ।
ମହାଲକ୍ଷ୍ମୀ ଆଦ୍ୟା ତାଙ୍କର ପୂଜନ
ହୁଏ ବିଧି ବିଧାନରେ ।୮।
ମୂଳା ଗେଣ୍ଡୁଫୁଲ ନବବସ୍ତ୍ର ଢାଙ୍କି
ଲକ୍ଷ୍ମୀଙ୍କର ପୂଜା ହୁଏ ।
ପ୍ରଥମାଷ୍ଟମୀରେ ଘରମାନଙ୍କରେ
ପିଠାପଣା ନିଶ୍ଚେ ହୁଏ ।୯।
ବାରମାସେ ତେର ପରବ ଆମର
ଓଡ଼ିଆ ଘରେ ହୁଅଇ ।
ପିଠାପଣା ପୂଜା ବଣ୍ଟା ବଣ୍ଟି କରି
ମନ ଆନନ୍ଦ ଲଭଇ ।୧୦।
