ଶ୍ରମର ମୂଲ୍ୟ
ଶ୍ରମର ମୂଲ୍ୟ
ଶାଶୁ ଡାକିଛନ୍ତି ଶୁଣି ନଟବର
ସମ୍ଭାଳି ପାରୁନି ଖୁସି,
ପେଣ୍ଟ ସାର୍ଟ ବୁଟ୍ ପିନ୍ଧି ସରାଗରେ
ବାହାରିଲା ହସି ହସି ।
ଗାଡି ଘୋଡ଼ା ନାହିଁ ଶ୍ଵଶୁର ଘରକୁ
ଚାଲଇ ପଦ ବ୍ରଜରେ,
ଥକ୍କା ହୋଇ ନଟ ବସି ପଡେ ଯାଇ
ଦୋକାନ ଆଗ ବେଞ୍ଚରେ ।
ଦେହରୁ ଖୋଲିଲା ସାର୍ଟ ଟି ତାହାର
ପୋଛିଲା ବୁଟ୍ କୁ ବସି,
ସାର୍ଟ ଖୋଲି ବୁଟ୍ ପୋଛୁଅଛ କିଆଁ
ଦୋକାନୀ ପଚାରେ ହସି ?
ନଟ କହୁଅଛି ବୁଝିଲନାଁ ଭାଇ
ବୁଟ୍ ହିଁ ମୋର ଜୀବନ,
କେତେ ଶ୍ରମ ଦାନେ କିଣିଅଛି ୟାକୁ
ସେକଥା ତୁମେ ଜାଣିନ ।
ଆଶ୍ଚର୍ଯ୍ୟେ ଦୋକାନୀ ପଚାରୁଛି,ଯେବେ
ନିଜ ପଇସାରେ ବୁଟ୍,
ପାଇଗଲ ବୋଧେ ମାଗଣାରେ ଏହି
ପିନ୍ଧି ଥିବା ସାର୍ଟ ସୁଟ୍ ?
ହେୟଜ୍ଞାନ କରି ଦୋକାନୀ ପ୍ରଶ୍ନର
ଉତ୍ତର ଦିଅଇ ନଟ,
ବାପାଙ୍କ ଟଙ୍କାରେ ଏସବୁ କିଣିଛି
ବାକି ଯାହା ଦେଖ ଥାଟ୍ଟ ।
କହୁଛି ଦୋକାନୀ ନିଜ କଷ୍ଟ ବୁଝି
ଯତ୍ନେ କର ବୁଟ୍ ସଫା,
ବାପାଙ୍କ କଷ୍ଟର ମୂଲ୍ୟ ବୁଝି ଯିବ
ତୁମେ ଯେବେ ହେବ ବାପା ।