ଶିଶୁ ସଚେତନ

ସାବଧାନ ହୁଅ ମାଆ ମାଉସୀ ମୋ

  ଆସିଛି ଖରାପ ବେଳ

କରୋନା ଆତଙ୍କ ସାରା ଭାରତ ରେ

  ଚଳାଇଛି ତାର ଖେଳ |

ଘରେ ଘରେ ଆଜି ଡେରା ପକାଇଛି

   ମୃତ୍ୟୁ ର ଅଜବ କାଣ୍ଡ 

ଉଣ୍ଡି ଉଣ୍ଡି ଖାଲି ବାଛି ନେଉଅଛି

   ଦେଉଛି ମରଣ ଦଣ୍ଡ |

ପ୍ରଥମ ଲହର ଆସିଲା ଯେବେଠୁ

  ଗ୍ରାସିଲା ଅଳ୍ପେ ବହୁତ 

ଦ୍ଵିତୀୟ ଲହର ସାଜିଛି ନୃଶଂସ

   ସଭିଙ୍କୁ ମାରୁଛି ଲାତ |

ଟାଣି ନେଉଅଛି ପିଶାଚ ସାଜିଛି

   ଶୋଷି ନେଉଅଛି ପ୍ରାଣ

କେତେ ଯେ କାହାର ଘର ଉଜାଡୁଛି

  ନାହିଁ ଏଠି ପରିତ୍ରାଣ |

ଧନୀ କି ଗରିବ ଦେଶର ସେବକ

   ସବୁ ତା ଫାଶ ରେ ବନ୍ଧା

 ଅକାଳେ ନାଶୁଛି ନିରୀହ ଜୀବନ

   ଛାଡ଼ୁନି କରୋନା ଯୋଦ୍ଧା |

ପୁଣି ଆସୁଅଛି ତୃତୀୟ ଲହର

   ଲହ ଲହ କରି ଜିହ୍ୱା

ବିଶେଷଜ୍ଞ ମାନେ ମତ ଦେଉଛନ୍ତି

   ମାରିବ ସେ ପିଲାଛୁଆ |

ସବୁଦୁଃଖ ଠାରୁ ଏ ଦୁଃଖ ଅଧିକ

   ପିତା ମାତାଙ୍କୁ ହିଁ ଦେବ

ସେଥିପାଇଁ ବେଳୁ ହୋଇ ସାବଧାନ

   ନିଜ ପିଲା ଯତ୍ନ ନେବ |

ଖେଳକୁଦ ପାଇଁ ଘର ଠୁ ଦୂରକୁ

   ଛାଡ଼ନାହିଁ କେବେହେଲେ

ଅନ୍ୟଠାରୁ ଯେତେସମ୍ଭବ ଦୂରେଇ

   ରଖିବା ଉଚିତ ଭଲେ |

ସାବୁନ ରେ ହାତ ଧୋଇ ଶିଖାଇବା

   ବେଳୁହିଁ ଅଭ୍ୟାସ କର

ସାନିଟାଇଜର ବ୍ୟବହାର ପାଇଁ 

   ପିଲାଙ୍କୁ କର ତତ୍ପର |

ଜ୍ୱର ଥଣ୍ଡା କାଶ କଫ ଯଦି ହୁଏ

   ତୁରନ୍ତ ଚିକିତ୍ସା କର

ପରାମର୍ଶ ନେଇ ଡାକ୍ତର ବାବୁଙ୍କ

   କର ସେହି ଉପଚାର |

ଧୈର୍ଯ୍ୟହରା ହୋଇ କର ନାହିଁ କିଛି

  ଅଖଣ୍ଡ ବିଶ୍ୱାସ ରଖ

ନିଜ ପିଲାପ୍ରତି ସତର୍କ ରହିବା

    ଅଭ୍ୟାସ କରି ଶିଖ |

ବର୍ଷାଦିନ ଇଏ ସଂକ୍ରମଣ ବୃଦ୍ଧି

  ଅନେକ ମାତ୍ରାରେ ହେବ

ତେଣୁକରି ତୁମେ ନିଜ ପିଲାଯତ୍ନ

   ହଜାରେ ଗୁଣରେ ନେବ |