ଶେଷ ଠିକଣା

ତୁମେ ମୋ ମନ ବନର ସୁନା ମଇନା

ଖେଳୁଥିଲ ହସୁଥିଲ

କରି ବାହାନା ।

ତୁମେ ମୋ.......।

ଚୁନାଚୁନା ସ୍ଵପ୍ନ ବୁଣି ମୋ ଆଖିରେ

ତୁମ ସାଥେ ଉଡିବାକୁ ଡେଣା ଯୋଖିରେ

ରଙ୍ଗ ଭରୁଥିଲ

ମଙ୍ଗ ଭିଡୁଥିଲ

ରଙ୍ଗରେ ଢଙ୍ଗରେ କେତେ ନୀଳ ନୟନା ।

ତୁମେ ମୋ.......

ଆକାଶର ନିଳିମାକୁ ଦେହେ ଲଗାଇ

ସୁନାଝରା ସକାଳରେ ଶିଶିର ନାଇ

ଡେଣା ଝାଡୁଥିଲ

ଅଣ୍ଟା ଭିଡୁଥିଲ

ଚତୁରେ ଚାତୁରୀ ଭରି ଚମ୍ପାବରଣା ।

ତୁମେ ମୋ.... ।

ଛାଇର ଆଲୁଅ ତଳେ ଖେଳ ଜମେଇ

ତାରାଫୁଲ ଅଗଣାରେ ମନକୁ ମୋହି

ନିଜେ ଭିଜୁଥିଲ

ମୋତେ ଭିଜାଇଲ

ନାଚିଲ ଝୁଲାଇ କେତେ ମେଘଝୁଲଣା ।

ତୁମେ ମୋ......

ଜହ୍ନର ଜୋଛନା ହସେ ହସ ମିଶାଇ

ନାଚୁଥିଲ ମୋ ସାଥିରେ ତାଳ ପକେଇ

ମୋତି ଝରୁଥିଲା

ରାତି ସରୁଥିଲା

କୁମୁଦ ଓଠରେ ନାଇ ଲାଜ ଗହଣା ।

ତୁମେ ମୋ.....

ନିଶିଥିନୀ କଳାକୁଞ୍ଜେ ହୀରକ ପରି

ଝଟକାଇ ଅଙ୍ଗବାସ ସୁହାଗ ଭରି

ମନ ଚୋରିକଲ

ଧ୍ୟାନ ଭାଙ୍ଗିଦେଲ

ସରାଗେ ହଜାଇ ମୋର ଶେଷ ଠିକଣା ।

ତୁମେ ମୋ...।