ଶେଷ କେଉଁଠି

ରାତିର ରେଶମୀ ରୂପେଲି ରାଇଜେ

ତୁମେ ଯେ ମହୁଆ ମେଘ

ମୁଁ ଯେ ମାଘର ମହୁର ମୁହାଣେ

ବଳକା ଲୁହର ଦାଗ

ଦିନର ସାଇତା ସୁନେଲି ସପନେ

ତୁମେ ଅସହଜ ଭିଜା ଦିଗ

ମୁଁ ଯେ ଶ୍ରାବଣୀର ଶ୍ରାବଣ କନ୍ୟା

ଆଷାଢ଼ୀ ପଣତ ରାଗ

ସଂଧ୍ୟାର ଅନ୍ଧାର ପୀତ ବସନରେ

ତୁମେ ଶୁଖା ସଳିତାର ଦାଗ

ମୁଁ ଯେ ସକାଳର ଫଲଗୁ ଝରା ନଈ

ତୁମେ ଶୀତ ବସନ୍ତର ଯୋଗ

ପଲାଶ ବନର ଅଳସ ଛାଇରେ

ତୁମେ ମଳୟର ମଧୁ ରାଗ

ଅବଶ ବିବଶ ସାୟାହ୍ନରେ ମୁଁ

ଅବଶିଷ୍ଟ ଉପହାସ ଶେଷ ଭାଗ

ମୟୂରୀ ମାୟାବିନୀ ଆଖିର ନିଶାରେ

ତୁମେ ଶେଷ ବସନ୍ତର ସଂଗ

ଅଧୁରା ବିଧୁରା ପ୍ରଣୟିନୀ ମୁହିଁ

ସାତସୁର ସାତରଙ୍ଗ ପରେ ମୁଁ ଅଷ୍ଟମ ରଙ୍ଗ।