ଲାଇବ୍ରେରୀ
ପ୍ରୋଫାଇଲ୍
ସବୁ ଲେଖାଅଛି ବହିରେ
ସବୁ ଲେଖାଅଛି ବହିରେ
1 min
227
ଗୁଡି ଛିଡିଗଲେ ଖସି ଖସି ଯାଏ
ପଡିଯାଏ ଯାଇ କୋଉଠି
ତେଲ ସରିଗଲେ ଗଡେ ନାହିଁ ଗାଡ଼ି
ରହିଯାଏ ଥାଏ ଯୋଉଠି ।।
କହିଦେଲେ ସବୁ କହିବା ପାଇଁକି
କିଛି କଥା ଆଉ ନଥାଏ
ବାଟ ଚାଲି ଚାଲି ଘରେ ପହଞ୍ଚିଲେ
ଗୋଡ ଦୁଇ ଭାରି ବଥାଏ ।।
ସଞ୍ଜ ନଇଁଗଲେ ସୂରୁଜ ଆଲୋକ
ଖୋଜିଲେ ଆଉ ତ ମିଳେନା
ଯିଏ ହେଲେ ହେଉ ପୁରିଥିଲେ ପେଟ
ଯାହା ଦେଲେ ଆଉ ଗିଳେନା ।।
ଧନ ଯଦି ନାହିଁ ଯାତରା ବୁଲାରେ
ମନ କିବା ଆଉ ଲାଗଇ
ଭିକ ମିଳିଗଲେ ଭିକାରିଟି ଫେରେ
ଆଉ କି ସେ ମୁଠେ ମାଗଇ ।।
ରାତି ଗଲେ ପାହି ଆଉ ଡେରି ନାହିଁ
ତାରାମାନେ ଲୁଚି ଯାଆନ୍ତି
ଶୀତ ଫେରିଗଲେ କୁଆଡେ ଥାଆନ୍ତି
ପିକମାନେ ଆସି ଗାଆନ୍ତି ।।
ନଈ ଶୁଖିଗଲେ ଅଲୋଡା ହୋଇକି
ପଡି ରହିଥାଏ ନାଆଟା
ଅଣ ଦେଖା କଲେ ଧୀରେ ଧୀରେ ଧୀରେ
ବଡ ହୋଇଯାଏ ଘାଆଟା ।।
ଯାହା ପରେ ଯାହା ଘଟିବାକୁ ଥାଏ
ଘଟୁଥାଏ ତାହା ମହୀରେ
ବାକିତକ ଯେତେ ପଢିଲେ ଜାଣିବା
ସବୁ ଲେଖାଅଛି ବହିରେ ।।
