ସ୍ୱପ୍ନର ନାୟିକା

ସ୍ୱପ୍ନର ନାୟିକା ପ୍ରେମର ପ୍ରେମିକା

କୋଉଁଠି ଗୋ ତୁମେ ଜାଣେନା

ସପନରେ ଯେବେ ତୁମ ଛବି ଦେଖେ

ମନ ଖୋଜେ ତୁମ ଠିକଣା

ତୁମ କଥା ଭାବି ନୀତି ନୀତି ପ୍ରିୟା

ଦେଖୁଛି ନୂଆ ସପନ

ସେଇ ସପନରେ ତୁମ ଅଛ ସାଥି

ଦେବାକୁ ତୁମରି ମନ

ରାତି ପାହିଗଲେ ସପନ ଭାଙ୍ଗିଲେ

ଲାଗେ ଭାରି ଏକା ଏକା

ସ୍ବପ୍ନର ନାୟିକା ପ୍ରେମର ପ୍ରେମିକା ।।

ଆସ ଗୋ ରୂପସୀ ସବାରିରେ ବସି

ଆଉ ବିଳମ୍ବ ନ କରି

ବିଳମ୍ବ କରିଲେ ଆଉ କିଏ କାଳେ

ମନ କରିନେବ ଚୋରି

ହୃଦୟରେ ମୋର ତୋଳିଛି ମୁଁ ଘର

ତୁମକୁ ରଖିବା ପାଇଁ

ମନର ମାନସୀ ପ୍ରିୟର ପ୍ରେୟସୀ

ବାଟକୁ ବସିଛି ଚାହିଁ

ବୋଳି ଦେଲ ମନେ ପ୍ରେମର ଅବିର

ସବୁ ରଙ୍ଗ ଲାଗେ ଫିକା

ସ୍ୱପ୍ନର ନାୟିକା ପ୍ରେମର ପ୍ରେମିକା ।।

ମେଘ ଲେଉଟିଲେ ଉଜୁଡ଼ା ଫସଲେ

ଦେଇକି ପାରିବ ଫଳ

ଆସ ଆସ ସୁନା ମୋ ନୀଳ ନୟନା

ଗଡି ଯାଉଛି ଏ ବେଳ ।।

ସପନରେ ଆସି ମୋ ପାଖରେ ବସି

କହୁଛ କଥା ପ୍ରେମର

ନାଲି ଓଠ ତୁମ ଫୁଲର ପାଖୁଡ଼ା

ମୁଁ ଅଟେ ତାର ଭ୍ରମର

ସପନରେ ସିନା ନୀତି ଆସୁଅଛ

ବାସ୍ତବରେ ମରୀଚିକା

ସ୍ୱପ୍ନର ନାୟିକା ପ୍ରେମର ପ୍ରେମିକା ।।